‘දිට්වා’ සුළි කුණාටුවෙන් හානියට පත් වූ උතුරු සහ මන්නාරම දුම්රිය මාර්ගයන්හි අලුත්වැඩියා කටයුතු අවසන් කර ඇතත්, ‘යාල් දේවී’ සහ ‘උත්තර දේවී’ ඇතුළු ප්රධාන දුම්රිය කිහිපයක් තවමත් ධාවනයට එක් නොකිරීම හේතුවෙන් මගීන් දැඩි පීඩාවට පත්ව ඇතැයි දුම්රිය ස්ථානාධිපතිවරුන්ගේ සංගමය පවසයි.
මෙම ගැටලුව සම්බන්ධයෙන් අදහස් දැක්වූ එම සංගමයේ සභාපති සුමේධ සෝමරත්න මහතා පෙන්වා දුන්නේ, දුම්රිය හිඟය සහ පරිපාලනමය ගැටලු හේතුවෙන් මෙම තත්ත්වය උද්ගත වී ඇති බවයි. දුම්රිය සාමාන්යාධිකාරීවරයා උත්සාහ දැරුව ද, ප්රවාහන අමාත්යාංශය මට්ටමින් අවශ්ය පහසුකම් නොලැබීම හේතුවෙන් දුම්රිය ධාවනය යථා තත්ත්වයට පත් කිරීමට නොහැකි වී ඇති බව ඔහු චෝදනා කරයි.
තවද, රජයේ සේවකයන් සඳහා මාසික ප්රවේශපත්ර නිසි කලට වේලාවට දුම්රිය ස්ථාන වෙත නොලැබීම නිසා තමන් දැඩි අපහසුතාවකට පත්ව සිටින බවද ඔහු සඳහන් කළේය. ඉන්ධන අර්බුදයක් පවතින මෙවැනි කාලයක දුම්රිය ප්රවාහනය අත්යවශ්ය සේවාවක් වුවද, බලධාරීන් ඒ කෙරෙහි දක්වන නොසැලකිල්ල හෙළා දකින බව සභාපතිවරයා වැඩිදුරටත් කියා සිටියේය.
මුහුදුබඩ දුම්රිය මාර්ගය ද මේ වන විට දැඩි අබලන් තත්ත්වයක පවතින බවත්, පීලි මාරු නොකර වේග සීමා පමණක් පැනවීම මගී ජීවිත අවදානමට ලක් කරන්නක් බවත් ඔහු අනතුරු ඇඟවීය. විදුලි දුම්රිය ව්යාපෘතිවලට පෙර පවතින දුම්රිය සේවා යථා තත්ත්වයට පත් කර, මාර්ග නඩත්තුව නිසි පරිදි සිදු කරන ලෙස ඔහු බලධාරීන්ගෙන් ඉල්ලා සිටියි.
