අස්වැසුම සුබසාධක ප්රතිලාභ වැඩසටහන යටතේ 2026 අප්රේල් මාසයට අදාළ දීමනා ලබාදීමේදී සිදු වූ තාක්ෂණික දෝෂයක් හේතුවෙන් ප්රතිලාභීන් පිරිසකට අදාළ මුදල් දෙවරක් ගෙවීමේ සිදුවීමක් වාර්තා වේ. ෆ්රී ලෝයර්ස් (Free Lawyers) සංවිධානය පෙන්වා දෙන්නේ මේ හරහා රුපියල් ලක්ෂ 5,000 කට ආසන්න මුදලක් වැඩිපුර ගෙවා ඇති බවයි. අප්රේල් මාසයේ ප්රතිලාභ ලැබීමට නියමිත පවුල් ලක්ෂ 17 කට අධික සංඛ්යාවෙන් කොටසකගේ බැංකු ගිණුම් වෙත මෙලෙස දීමනාව දෙවරක් බැර වී ඇති බව එම සංවිධානය වැඩිදුරටත් සඳහන් කරයි.
මෙම සිදුවීම සම්බන්ධයෙන් අදහස් දක්වන සුබසාධක ප්රතිලාභ මණ්ඩලයේ සභාපති නිමල් කොටවලගෙදර මහතා ප්රකාශ කරන්නේ මෙය හදිසියේ සිදු වූ අත්වැරදීමක් බවයි. සිංහල සහ දමිළ අලුත් අවුරුද්ද වෙනුවෙන් ලබා දුන් විශේෂ දීමනාව සහ රජය විසින් වැඩි කළ දීමනා මුදල ගෙවීමට අදාළ ලේඛන හදිසියේ සකස් කිරීමේදී මෙම දෝෂය සිදු වී තිබේ. ඇතැම් පිරිසකට බැංකු කිහිපයක් හරහා මුදල් බැර වී තිබුණද එම අතිරික්ත මුදල් නැවත බැංකු මගින් ගෙන්වාගෙන දෝෂය නිවැරදි කිරීමට මේ වන විට පියවර ගෙන ඇති බව ඔහු අවධාරණය කරයි.
කෙසේ වෙතත් ජනාධිපති නීතිඥ මෛත්රී ගුණරත්න මහතා ඇතුළු පිරිසක් අත්සන් කළ පැමිණිල්ලක් මගින් කතානායකවරයා සහ මන්ත්රීවරුන් දැනුවත් කිරීමට ෆ්රී ලෝයර්ස් සංවිධානය කටයුතු කර තිබේ. එහිදී ඔවුන් ඉල්ලා සිටින්නේ අත්වැරදීමකින් බැර වූ මෙම අතිරික්ත මුදල් නැවත අය කර ගැනීමේදී අදාළ දිළිඳු ජනතාව පීඩාවට පත් නොකර එම මුදල් වාරික වශයෙන් අය කර ගැනීමට කටයුතු කරන ලෙසයි. පද්ධතියේ පවතින මෙවැනි මූල්ය පාලන දෝෂ ඉදිරියේදී සිදු නොවීමට රජය වගබලා ගත යුතු බව ද එම සංවිධානය පෙන්වා දෙයි.
