ශ්රීලන්කන් ගුවන් සමාගමේ හිටපු ප්රධාන විධායක නිලධාරී කපිල චන්ද්රසේන මහතාගේ මරණය සැකකටයුතු බවට කොල්ලුපිටිය පොලීසිය අද කොටුව මහෙස්ත්රාත් අධිකරණයට කරුණු වාර්තා කර තිබේ. කොල්ලුපිටිය, පේද්රිස් මාවතේ පිහිටි නිවසක තිබී අද උදෑසන ඔහුගේ මළ සිරුර සොයාගත් අතර, මේ වන විට කොටුව මහෙස්ත්රාත්වරයා අදාළ ස්ථානයට පැමිණ මහෙස්ත්රාත් පරීක්ෂණය පවත්වමින් සිටියි.
මෙම මරණය වාර්තා වන්නේ ඔහු සම්බන්ධයෙන් පැවැත්වෙන අධිකරණ ක්රියාවලියක තීරණාත්මක හැරවුමක් සිදුව තිබූ පසුබිමකය. එයාර් බස් ගනුදෙනුවට අදාළව ඇප මත නිදහස්ව සිටි කපිල චන්ද්රසේන මහතා, ව්යාජ ඇපකරුවන් ඉදිරිපත් කර අධිකරණය නොමඟ යවා ඇති බවට ඊයේ කරුණු අනාවරණය විය. ඒ අනුව ඔහුගේ ඇප අවලංගු කර, වහාම අත්අඩංගුවට ගන්නා ලෙස කොටුව මහෙස්ත්රාත් අධිකරණය ඊයේ වරෙන්තු නිකුත් කර තිබුණි.
පසුගිය මාර්තු මාසයේදී අල්ලස් හෝ දූෂණ චෝදනා විමර්ශන කොමිසම මගින් අත්අඩංගුවට ගත් ඔහු, රුපියල් මිලියන 2ක අල්ලසක් ලබාගත් බවට චෝදනා ලැබ සිටියෙකි. මාස දෙකකට ආසන්න කාලයක් රක්ෂිත බන්ධනාගාර ගතව සිට මැයි 05 වනදා ඇප ලබා සිටි ඔහු මෙලෙස මියයාම සම්බන්ධයෙන් කොල්ලුපිටිය පොලීසිය පුළුල් විමර්ශනයක් ආරම්භ කර ඇත.
