අමෙරිකානු ජනාධිපති ඩොනල්ඩ් ට්රම්ප් සහ චීන ජනාධිපති ෂී ජින්පින් අතර බීජිං නුවරදී පැවැත්වෙන සාකච්ඡාවලදී හෝමූස් සමුද්ර සන්ධිය විවෘතව තැබීමේ අවශ්යතාවය පිළිබඳව එකඟතාවයක් ඇති වී තිබියදී, එක්සත් අරාබි එමීර් රාජ්යය අසලදී ඉරාන නිලධාරීන් විසින් නෞකාවක් පැහැරගෙන ඇති බව වාර්තා වේ.
එක්සත් අරාබි එමීර් රාජ්යයේ ෆුජයිරා (Fujairah) වරාය අසල නැංගුරම් ලා තිබූ නෞකාවකට බලයලත් නොවන පිරිසක් ඇතුළු වී එය ඉරාන මුහුදු සීමාව දෙසට ධාවනය කරවන බව බ්රිතාන්ය සමුද්රීය ආරක්ෂක ඒජන්සිය (UKMTO) තහවුරු කළේය. අප්රිකාවේ සිට එක්සත් අරාබි එමීර් රාජ්යය බලා පශු සම්පත් ප්රවාහනය කරමින් තිබූ ඉන්දියානු භාණ්ඩ ප්රවාහන නෞකාවක් ඕමාන් මුහුදු තීරයේදී ප්රහාරයකට ලක්ව බදාදා දින ගිලී ගියේය. එහි සිටි කාර්ය මණ්ඩලයේ 14 දෙනාම ඕමාන් වෙරළාරක්ෂක බලකාය විසින් බේරාගෙන ඇති අතර මෙම ප්රහාරය මිසයිලයක් හෝ ඩ්රෝන යානයක් මගින් එල්ල වූවක් බවට සැක කෙරේ.
පෙබරවාරි 28 වනදා ආරම්භ වූ ඉරාන යුද්ධයත් සමඟ ඉරානය විසින් හෝමූස් සමුද්ර සන්ධිය වසා දැමීම හේතුවෙන් ලෝක බලශක්ති සැපයුමට දැඩි බාධා එල්ල වී තිබේ. ඉරානයට කිසිදා න්යෂ්ටික අවි ලබා නොදිය යුතු බවටත් මෙම මුහුදු මාර්ගය විවෘතව තැබිය යුතු බවටත් ට්රම්ප් සහ ෂී ජින්පින් මෙහිදී එකඟ වී ඇත. එක්සත් ජනපදය පසුගිය මාසයේදී ඉරානයට එල්ල කරන ප්රහාර තාවකාලිකව නතර කළද, ඉරාන වරායන් අවහිර කරමින් සම්බාධක පැනවීමට පියවර ගෙන තිබේ.
