එක්සත් අරාබි එමීර් රාජ්යයේ (UAE) සේවා සපයන ආයතනයක විද්යුත් තැපැල් (Email) ගිණුමක් හැක් කරමින් සිදුකළ වංචනික මුදල් ගෙවීමක් සහ ඉන්දියාවේ චෙන්නායි නුවර පිහිටි කාර්යාලයේ සිදුවූ මූල්ය වංචාවක් සම්බන්ධයෙන් මාධ්ය මඟින් වාර්තා කර තිබූ සිදුවීම් ද්විත්වය පිළිබඳව ශ්රීලංකන් ගුවන් සමාගම (SriLankan Airlines) විශේෂ පැහැදිලි කිරීමක් නිකුත් කර තිබේ.
මෙම මූල්ය වංචාවන් සිදුව ඇති ආකාරය දෙස බැලීමේදී, ඩුබායි හි පිහිටි සේවා සපයන්නෙකු වෙත ගෙවිය යුතුව තිබූ එක්සත් අරාබි එමීර් රාජ්යයේ ඩිරාම් 974,000ක මුදලක් ඔවුන් වෙත ලැබී නොමැති බවට කළ දැනුම්දීමක් මත ප්රධාන විමර්ශනයක් ආරම්භ කර ඇත. එහිදී අනාවරණය වී ඇත්තේ තෙවන පාර්ශවීය හැකර්වරයෙකු විසින් අදාළ සේවා සපයන ආයතනයේ විද්යුත් තැපැල් ගිණුමට අනවසරයෙන් ප්රවේශ වී, එහි බැංකු ගිණුම් විස්තර සහ සනාථ කරන ලියකියවිලි නිල සන්නිවේදන නාලිකා ඔස්සේ වෙනස් කර ඇති බවයි. මේ හේතුවෙන් එම වෙනස් කළ බැංකු ගිණුම සැබෑ සේවා සපයන්නාගේම යැයි විශ්වාස කරමින් ගුවන් සමාගම විසින් අදාළ මුදල් ගෙවීම් සිදුකර තිබේ.
මේ පිළිබඳව දැනගත් වහාම ක්රියාත්මක වූ ශ්රීලංකන් ගුවන් සමාගම, අදාළ බැංකු ගිණුමට සිදුකරන ඉදිරි ගෙවීම් වහාම අත්හිටුවීමට පියවර ගෙන ඇත. මෙම ගැටලුව පැන නැගී ඇත්තේ සේවා සපයන ආයතනයේ විද්යුත් තැපැල් පද්ධතියේ ආරක්ෂාව බිඳවැටීම (Email Compromise) හේතුවෙන් වන අතර, එය ගුවන් සමාගමේ පාලනයෙන් බැහැර වූවක් බැවින්, සේවා සපයන්නාට අදාළ මුදල් නොලැබීමේ වගකීම තමන්ට භාරගත නොහැකි බව ද ඔවුහු අවධාරණය කරති. මේ සම්බන්ධයෙන් එක්සත් අරාබි එමීර් රාජ්යයේ බලධාරීන්ට මෙන්ම ශ්රී ලංකා අපරාධ පරීක්ෂණ දෙපාර්තමේන්තුවට (CID) ද පැමිණිලි කර ඇති අතර, දෙරටේම මේ වන විට විධිමත් විමර්ශන ආරම්භ කර තිබේ.
