වත්මන් රජය ජාත්යන්තර මූල්ය අරමුදලේ (IMF) ඉලක්ක අභිබවා යාමට දැඩි ලෙස උත්සාහ කිරීම තුළ, බදු පරිපාලනය සහ සාපරාධී ක්රියා අතර භයානක සම්බන්ධතාවයක් නිර්මාණය වෙමින් පවතින බව විපක්ෂ නායක සජිත් ප්රේමදාස මහතා පවසයි. කොළඹ පිහිටි විපක්ෂ නායක කාර්යාලයේදී බදු පරිපාලන විශේෂඥයන්, ව්යාපාරිකයන් ඇතුළු ක්ෂේත්රයේ පාර්ශවකරුවන් සමඟ පැවැති විශේෂ සාකච්ඡාවකදී ඔහු මේ බව ප්රකාශ කළේය. පුද්ගලයෙකුට යම් කරුණක් අමතක වීම, රෝගී වීම හෝ විදේශගත වීම වැනි හිතාමතා සිදු නොකරන නොසැලකිලිමත්භාවයක් මත බදු කොන්දේසි ඉටු නොකිරීම සාපරාධී වරදක් (Criminal Offence) ලෙස සලකා කටයුතු කිරීමට රජය සූදානම් වන බවට ඔහු මෙහිදී බරපතළ ලෙස චෝදනා කළේය.
සිරගත කිරීමේ තර්ජනය ඉදිරියට දමා බදු එකතු කිරීමට උත්සාහ කිරීම මූලික මානව අයිතිවාසිකම් උල්ලංඝනය කිරීමක් මෙන්ම සමස්ත ව්යාපාරික ප්රජාවම දැඩි භීතියකට පත් කිරීමක් බව විපක්ෂ නායකවරයා පෙන්වා දෙයි. මේ හරහා නව ව්යාපාර බිහිවීම, ආයෝජන ව්යාප්ත වීම සහ රැකියා උත්පාදනය සම්පූර්ණයෙන්ම අඩාල වන බව ද ඔහු සඳහන් කළේය. එලෙසම, මෙම නව බදු ප්රතිපත්තිය මඟින් රජය අධිකරණ බලය පවා අභියෝගයට ලක් කරමින් ආණ්ඩුක්රම ව්යවස්ථාව මෙන්ම ප්රජාතන්ත්රවාදයේ මූලික පදනම වන ව්යවස්ථාදායකය, විධායකය සහ අධිකරණය අතර පවතින සංවරණ හා තුලන (Checks and Balances) සංකල්පය ද උල්ලංඝනය කරන බව ඔහු අවධාරණය කළේය. බදු ගෙවිය යුතු සියලු දෙනාම අනිවාර්යයෙන්ම බදු ගෙවිය යුතු අතර එය කිසිසේත් පැහැර හැරිය නොයුතු බව පිළිගන්නා නමුත්, තාක්ෂණික හෝ ප්රායෝගික ප්රමාදයන් සාපරාධී ක්රියා ලෙස සලකා දඬුවම් පැමිණවීම ප්රජාතන්ත්රවාදයට එල්ල කරන මරු පහරක් බව සජිත් ප්රේමදාස මහතා වැඩිදුරටත් කියා සිටියේය.
