බදු ගෙවන්නන් හඳුනාගැනීමේ අංකය හෙවත් “ටින්” (TIN) අංකය ලබා නොගන්නා තැනැත්තන්ට දඬුවම් නියම කිරීමට අදාළ විධිවිධාන ඇතුළත් දේශීය ආදායම් (සංශෝධන) පනත් කෙටුම්පත අද (19) පාර්ලිමේන්තුවේදී ඡන්ද විමසීමකින් තොරව, සංශෝධන සහිතව සම්මත විය.
මුදල් හා ක්රමසම්පාදන නියෝජ්ය අමාත්ය ආචාර්ය අනිල් ජයන්ත මහතා විසින් මෙම පනත් කෙටුම්පත විවාදය සඳහා ඉදිරිපත් කර තිබූ අතර, ඊයේ දිනයේදී මන්ත්රීවරුන් විස්සකට වැඩි පිරිසකගේ සහභාගීත්වයෙන් ඒ පිළිබඳ විවාදය පැවැත්විණි.
සජබ සංශෝධන ප්රතික්ෂේප වෙයි:
සමගි ජන බලවේගය (SJB) වෙනුවෙන් නීතිඥ සුජීව සේනසිංහ මහතා විසින් TIN අංකය නොමැති අයට පැනවීමට යෝජිත දඬුවම් ලිහිල් කිරීම වෙනුවෙන් සංශෝධන කිහිපයක් සභාවට ඉදිරිපත් කළේය. “දින තිහකින් දඩයක් සහ දින හැටකින් තවත් දඩයක් නියම කළ පසු, දින අනූවකින් හිතාමතා පැහැර හරින අය හඳුනාගත හැකියි. වංචනික ලෙස හිතාමතා බදු පැහැර හරින්නකු මැදිහත් කරගන්නා ආකාරය ගැන ද අපි සංශෝධන ඉදිරිපත් කරනවා” යැයි සේනසිංහ මහතා එහිදී පැවසීය.
කෙසේ වෙතත්, එම සංශෝධන මුදල් හා ක්රමසම්පාදන නියෝජ්ය අමාත්ය ආචාර්ය අනිල් ජයන්ත මහතා විසින් ප්රතික්ෂේප කරනු ලැබීය. ඒ අනුව, එම සංශෝධන ප්රතික්ෂේප කිරීමට විපක්ෂයේ ඇති විරුද්ධත්වය නිල වශයෙන් සටහන් කරගන්නා ලෙස සුජීව සේනසිංහ මහතා මුලසුනෙන් ඉල්ලා සිටියේය.
