ශ්රී ලංකාවේ දුම්රිය සේවාව නවීකරණය කර සංවර්ධනය කිරීම වෙනුවෙන් රුසියාවේ තාක්ෂණික සහ ආයෝජන සහයෝගීතාව ලබාගැනීම සඳහා දෙරට අතර විශේෂ අවබෝධතා ගිවිසුමකට (MoU) අත්සන් තබා ඇත.
රුසියාවේ කසාන් (Kazan) නුවර පැවැති XVII ජාත්යන්තර ආර්ථික සංසදය (International Economic Forum) සඳහා ශ්රී ලංකාව නියෝජනය කරමින් පාර්ලිමේන්තුවේ සභානායක, ප්රවාහන, මහාමාර්ග සහ නාගරික සංවර්ධන අමාත්ය බිමල් රත්නායක මහතා සහභාගි විය. මෙම රාජතාන්ත්රික සමුළුවට සමගාමීව දෙරටේ දුම්රිය ප්රවාහන ක්ෂේත්රයේ දියුණුව වෙනුවෙන් රුසියානු සමූහාණ්ඩුවේ ප්රවාහන අමාත්යාංශය සහ ශ්රී ලංකාවේ ප්රවාහන, මහාමාර්ග සහ නාගරික සංවර්ධන අමාත්යාංශය අතර මෙම ද්විපාර්ශ්වික ගිවිසුමට එළඹ තිබේ.
මෙම අවබෝධතා ගිවිසුම අත්සන් කිරීමේ නිල අවස්ථාව සඳහා රුසියානු සමූහාණ්ඩුවේ ප්රවාහන අමාත්යාංශයේ රාජ්ය ලේකම් සහ නියෝජ්ය ඇමැති ඩිමිත්රි ස්වෙරෙව් (Dmitry Zverev) මහතා සහ ශ්රී ලංකාවේ ප්රවාහන අමාත්ය බිමල් රත්නායක මහතා එක්වූහ. මෙමඟින් ඉදිරියේදී මෙරට දුම්රිය ක්ෂේත්රයට අවශ්ය නවීන රුසියානු තාක්ෂණික දායකත්වය සහ මහා පරිමාණ ආයෝජන අවස්ථා හිමිවීමට නියමිතය.
