ප්රතිපත්ති, සංඛ්යාලේඛන හෝ ආර්ථික මාදිලිවලින් පමණක් සංවර්ධනය මැනිය නොහැකි බවත්, එය මිනිසුන්ගේ එදිනෙදා ජීවන අත්දැකීම්වලින් වටහා ගත යුතු බවත් අග්රාමාත්ය ආචාර්ය හරිනි අමරසූරිය මහත්මිය ප්රකාශ කළාය.
ඇය මේ බව සඳහන් කළේ ඔක්ස්ෆර්ඩ් විශ්වවිද්යාලයේ ‘ඔක්ස්ෆර්ඩ් ස්කූල් ඔෆ් ග්ලෝබල් ඇන්ඩ් ඒරියා ස්ටඩීස්’ (OSGA) ආයතනය සංවිධානය කළ 2026 වාර්ෂික දේශනය (2026 OSGA Annual Lecture) ශාන්ත ඇන්තනී විද්යාලයේදී අමතමිනි. “සංවර්ධනයේ දේශපාලනය: ශ්රී ලංකාව සහ ඉන් ඔබ්බට” (The Politics of Development: Sri Lanka and Beyond) යන තේමාව යටතේ අගමැතිනිය මෙම දේශනය ඉදිරිපත් කළාය.
පාලන තන්ත්රයේ සමතුලිතතාවය සම්බන්ධයෙන් අදහස් දැක්වූ අගමැතිනිය, පරමාදර්ශයන් සහ ප්රායෝගික යථාර්ථයන් අතර සමතුලිතතාවක් පවත්වා ගැනීම රටවල පාලන තන්ත්රය මෙහෙයවීමේදී අත්යවශ්ය සාධකයක් බව අවධාරණය කළාය. විශේෂයෙන්ම ආර්ථික අර්බුද, ආයතනික අභියෝග සහ දිගුකාලීන අසමානතාවන්ගෙන් මිදෙමින් පවතින රටවලදී මෙය ඉතා වැදගත් වේ.
කාන්තා දේශපාලන සහභාගිත්වය පිළිබඳව කරුණු දක්වමින්, ශ්රී ලංකාවේ බිම් මට්ටමේ දේශපාලන ව්යාපාර සහ නායකත්ව අවකාශයන් සඳහා කාන්තාවන්ගේ දායකත්වය වර්ධනය වෙමින් පවතින බව පෙන්වා දුන් ඇය, සමාජයේ සහ දේශපාලන ව්යුහයන් තුළ මුල් බැසගෙන ඇති අභියෝග පරිවර්තනය කිරීමේදී තවමත් පවතින බාධාවන් පිළිබඳව ද කරුණු පැහැදිලි කළාය.
සාත්තු සේවාවේ (Care Work) වැදගත්කම පිළිබඳව ඇය සඳහන් කළේ, කාන්තාවන් විසින් පවුල, ප්රජාව සහ ආර්ථිකය වෙනුවෙන් සිදු කරනු ලබන ගෙවීම් ලබන සහ නොලබන සාත්තු සේවා (Care Work) හඳුනා ගැනීමේ වැදගත්කමයි. සාම්ප්රදායික ආර්ථික පද්ධතීන් තුළ මෙම දායකත්වය බොහෝ විට නොපෙනී පවතින බව ප්රකාශ කළ ඇය, තිරසර සංවර්ධනයක් මඟින් ආර්ථික ප්රගතිය ළඟා කර ගන්නා අතරම මානව ගරුත්වය, සාධාරණත්වය සහ සමාජ සුබසාධනය ආරක්ෂා කළ යුතු බව අවධාරණය කළාය.
අභියෝග සහ පරිවර්තනය පිළිබඳව සමාජ මානව විද්යාඥවරියක, ක්රියාකාරිනියක සහ දේශපාලන නායිකාවක ලෙස තම අත්දැකීම් ඇසුරින් අදහස් දැක්වූ අගමැතිනිය, දිගුකාලීන ප්රතිපත්ති ප්රතිසංස්කරණ සහ ආයතනික වෙනස්කම් සඳහා ඉවසීම, සාකච්ඡා මාර්ග සහ අඛණ්ඩ මහජන මැදිහත්වීම අත්යවශ්ය බව සිහිපත් කළාය.
