ශ්රී ලංකා ක්රිකට් පරිපාලනය විධිමත් කර විනිවිදභාවයකින් යුත් මූල්ය පාලනයක් ස්ථාපිත කිරීමේ අරමුණින්, නව ක්රිකට් ව්යවස්ථාවක් කෙටුම්පත් කර කඩිනමින් පාර්ලිමේන්තුවට ඉදිරිපත් කිරීමට කටයුතු යොදා ඇති බව ක්රිකට් පරිවර්තන කමිටුවේ සභාපති ඉරාන් වික්රමරත්න මහතා පවසයි.
ශ්රී ලංකා ක්රිකට් මූලස්ථානයේ පැවති මාධ්ය හමුවකදී අදහස් දක්වමින් සභාපතිවරයා අවධාරණය කළේ, ක්රිකට් ක්රීඩාවේ සැබෑ අයිතිකරුවන් පොදු මහජනතාව බැවින් නව ව්යවස්ථාව සකස් කිරීමේදී මහජන අදහස්වලට ප්රමුඛතාවක් ලබා දෙන බවයි. ජනාධිපතිවරයාගෙන් හෝ ක්රීඩා අමාත්යවරයාගෙන් පරිවර්තන කමිටුවට කිසිදු බලපෑමක් නොමැති බවත්, රජයෙන් ක්රිකට් ආයතනය ස්වාධීන කර ඇති බවත් ඔහු වැඩිදුරටත් සඳහන් කළේය.
පරිවර්තන කමිටුවේ ප්රධාන අරමුණු සහ ඉදිරි පියවරයන්හිදී, කමිටුවේ වගකීම් ස්වාධීනව ඉටු කරන බවත්, කුලය, ජාතිය, ආගම හෝ පන්තිය වැනි සාධකවලින් තොරව ක්රිකට් ආයතනයේ සෑම රුපියලක්ම පාසල් ක්රිකට්, කාන්තා ක්රිකට් සහ ජාත්යන්තර ජයග්රහණ වෙනුවෙන් පමණක් ආයෝජනය කරන බවත් සභාපතිවරයා පැවසීය.
ක්රිකට් ආයතනයේ පසුගිය කාලයේ සිදු වූ මූල්ය ගනුදෙනු පරීක්ෂා කිරීම සඳහා වෝහාරික විගණනයක් (Forensic Audit) සිදු කිරීමට නියමිතය. චිත්රසිරි කමිටු වාර්තාව පදනම් කරගෙන සකස් කරන නව ව්යවස්ථාව මාස 3-4ක් ඇතුළත පාර්ලිමේන්තුවට ඉදිරිපත් කිරීමේ ඉලක්කය පවතියි. ඒ සඳහා නීතිඥ කමිටුවක් පත් කර ඇති අතර ජාත්යන්තර ක්රිකට් කවුන්සිලය (ICC) ද ඒ පිළිබඳව දැනුවත් කර තිබේ.
පාසල් ක්රිකට් සංවර්ධනය සම්බන්ධයෙන් කමිටු සාමාජික සිදත් වෙත්තමුණි මහතා ප්රකාශ කළේ, පාසල් ක්රිකට් සඳහා පූර්ණ අවධානයක් යොමු කරන බවයි. 19න් පහළ පුහුණුකරුවන් සඳහා ප්රමිතියෙන් යුත් වැඩසටහන් ආරම්භ කිරීම සහ ජාත්යන්තර පුහුණු සැසි පැවැත්වීම මෙම සැලසුමට ඇතුළත් වේ.
මෙම පරිවර්තන කමිටුව සඳහා රොෂාන් මහානාම සහ කුමාර් සංගක්කාර වැනි ප්රවීණ ක්රීඩකයන්ගේ පූර්ණ සහයෝගය ලැබී ඇති බවත්, නීතිඥයන් සහ පරිපාලන ක්ෂේත්රයේ ප්රවීණයන්ගෙන් කමිටුව සමන්විත බවත් වැඩිදුරටත් සඳහන් විය.
