ඇමෙරිකානු ඩොලරයට සාපේක්ෂව ශ්රී ලංකා රුපියලේ අගය වේගයෙන් පහත වැටීම සහ වෙළෙඳපොළ තුළ ඇති වී තිබෙන විනිමය පීඩනය පිළිබඳව සොයා බැලීම සඳහා ශ්රී ලංකා මහ බැංකු අධිපති ආචාර්ය නන්දලාල් වීරසිංහ මහතා සහ මෙරට ප්රමුඛ පෙළේ බැංකුකරුවන් අතර විශේෂ සාකච්ඡාවක් පවත්වා තිබේ. මහ බැංකු පරිශ්රයේදී පැවැත්වුණු මෙම හමුව සඳහා වාණිජ බැංකුවල ප්රධාන විනිමය බෙදුම්කරුවන් (Currency Dealers) ද සක්රීයව සම්බන්ධ වී ඇති අතර, රුපියල වෙත එල්ල වී ඇති දැඩි පීඩනය පාලනය කිරීම සඳහා ගත හැකි ඉදිරි ක්රියාමාර්ග සම්බන්ධයෙන් මෙහිදී දෙපාර්ශවය අතර දීර්ඝ වශයෙන් අදහස් හුවමාරු වී ඇත.
මහ බැංකු වාර්තාවලට අනුව වසර තුනකට පසුව මෙරට ඉතිහාසයේ ඩොලරයේ ඉහළම විනිමය අනුපාතිකයන් වාර්තා වී ඇති අතර, එහිදී ඩොලරයක ගැනුම් මිල රුපියල් 342.63ක් සහ විකුණුම් මිල රුපියල් 354.03ක් ලෙස ඉහළ අගයක සටහන් විය. වත්මන් මූල්ය වෙළෙඳපොළ තුළ ඩොලර් සඳහා පවතින ඉල්ලුම අධික ලෙස ඉහළ යාම, විදේශ විනිමය ද්රවශීලතාවය පහළ බැසීම සහ ආනයනකරුවන් තමන්ගේ ඉදිරි ආනයන කටයුතු වෙනුවෙන් ඩොලර් ඇණවුම් කිරීම සැලකිය යුතු ලෙස වැඩි කිරීම මෙම තත්ත්වයට ඍජුවම බලපා තිබේ. මෙම කරුණු හේතුවෙන් දේශීය මුදල් ඒකකය මුහුණ දී ඇති අර්බුදකාරී ස්වභාවය සමනය කරමින් මූල්ය ස්ථාවරත්වය රැක ගැනීමට ගත යුතු හදිසි සහ තිරසාර පියවර රැසක් පිළිබඳව මෙම විශේෂ සාකච්ඡාවේදී අවධානය යොමු කර ඇත.
