උදාවීමට නියමිත වෙසක් උත්සවය නිමිත්තෙන් දිවයින පුරා පැවැත්වීමට සැලසුම් කර ඇති දන්සැල් ලියාපදිංචි කිරීමේ විශේෂ වැඩපිළිවෙළක් මේ වන විට ආරම්භ කර ඇති බව මහජන සෞඛ්ය පරීක්ෂකවරුන්ගේ සංගමය නිවේදනය කරයි. මෙම මස මුල සිට දිවයින පුරා පිහිටි සෞඛ්ය වෛද්ය නිලධාරී කාර්යාල (MOH) මට්ටමින් ආරම්භ කරන ලද මෙම ලියාපදිංචි කිරීමේ කටයුතුවලට අනුව, ඊයේ දිනය අවසන් වන විට දිවයින පුරා දන්සැල් 2,388 ක් පමණ ලියාපදිංචි වී ඇති බව එම සංගමයේ ලේකම් චමිල් මුතුකුඩ මහතා සඳහන් කරයි. මෙම දන්සැල් ලියාපදිංචි කිරීමේ කටයුතු ඉදිරි දිනවලදීත් ක්රියාත්මක වන අතර ලබන මැයි මස 29 වනදා දක්වා, එනම් වෙසක් පොහොයට පෙර දිනය දක්වාම දන්සැල් ලියාපදිංචි කිරීමට අවස්ථාව පවතින බව ද හෙතෙම කියා සිටියි.
කෙසේ වෙතත්, මෙවර වෙසක් උත්සවය වෙනුවෙන් දන්සලක් පැවැත්වීමට බලාපොරොත්තු වන සංවිධායකයින් හෝ පුද්ගලයින් සිටී නම්, අවසන් මොහොත වනතුරු නොසිට තම ලියාපදිංචි කිරීම් කටයුතු හැකි ඉක්මනින් සිදුකර ගන්නා ලෙස මහජන සෞඛ්ය පරීක්ෂකවරුන්ගේ සංගමය කාරුණිකව ඉල්ලා සිටියි. මෙලෙස කඩිනමින් ලියාපදිංචි වන ලෙස ඉල්ලා සිටින්නේ සෞඛ්ය වෛද්ය නිලධාරී කාර්යාල මට්ටමින් දන්සැල් ලියාපදිංචි කිරීමට අමතරව, එම දන්සැල් පිරිසිදුව හා සෞඛ්යාරක්ෂිතව මහජනතාව වෙත ලබා දෙන්නේ කෙසේද යන්න පිළිබඳව සංවිධායකයින් දැනුවත් කිරීමේ විශේෂ වැඩසටහන් ද පවත්වන බැවිනි. එම කටයුතු වඩාත් පහසු කරගැනීම සඳහා, තමන් පදිංචි ප්රදේශයේ සෞඛ්ය වෛද්ය නිලධාරී කාර්යාලයේ මහජන සෞඛ්ය පරීක්ෂකවරයා (PHI) හමුවී තම දන්සල කඩිනමින් ලියාපදිංචි කරගන්නා ලෙස වෘත්තීය සංගමය තවදුරටත් අවධාරණය කරයි.
