ලෝක දේශපාලනික අර්බුද සහ සැපයුම් දාමයන්හි අවිනිශ්චිතතාවන් හමුවේ ඇතිවිය හැකි ඕනෑම ගෝලීය බලශක්ති කම්පනයකට නොසැලී මුහුණ දිය හැකි ස්වෛරී සහ ස්ථාවර ශ්රී ලංකාවක් ගොඩනැගීම සඳහා වූ මහා පරිමාණ බලශක්ති ව්යාපෘති කිහිපයක ප්රගතිය හිටපු බලශක්ති අමාත්ය, පාර්ලිමේන්තු මන්ත්රී කුමාර ජයකොඩි මහතා විසින් අනාවරණය කර තිබේ. පසුගිය දශක කිහිපය තුළ මඟහැරුණු මෙම තීරණාත්මක ව්යාපෘති නිසි කළමනාකරණයකින් යුතුව නිම කිරීමට වත්මන් පියවරයන් හේතු වී ඇති බව ඔහු පෙන්වා දෙයි.
මෙරට උපායමාර්ගික ඉන්ධන සංචිත (Strategic Fuel Reserves) පුළුල් කිරීමේ අරමුණින්, ලංකා ඛනිජ තෙල් නීතිගත සංස්ථාව (CPC) විසින් ත්රීකුණාමලය තෙල් ටැංකි සංකීර්ණයේ ටැංකි 4ක ප්රතිසංස්කරණ කටයුතු ආරම්භ කර ඇති අතර ඉන් ටැංකි 2ක වැඩ කටයුතු මේ වන විටත් සම්පූර්ණයෙන්ම අවසන් කර ඇත. මෙම ටැංකි සෘජුවම භාවිතයට ගැනීම සඳහා අවශ්ය නල පද්ධතිය එළීමේ කටයුතු (Pipeline Network) ද කඩිනමින් නිම කිරීමට පියවර ගනිමින් සිටින බව බලශක්ති නියෝජ්ය අමාත්යවරයා ද තහවුරු කර තිබේ.
විදේශ විනිමය ඉතිරි කරගැනීම සඳහා සපුගස්කන්ද තෙල් පිරිපහදුවේ දෛනික පිරිපහදු ධාරිතාව බැරල් 50,000 සිට බැරල් 100,000 දක්වා දෙගුණයකින් ඉහළ නැංවීමේ දැවැන්ත වැඩසටහනක් ක්රියාවට නැංවේ. මෙම නවීකරණ කටයුතු සඳහා මේ වන විටත් ජාත්යන්තර ආයෝජකයන් රැසක් කැමැත්ත ප්රකාශ කර ඇති අතර, නවීන තාක්ෂණයෙන් යුතුව මෙම සමස්ත ව්යාපෘතිය නිම කිරීමට වසර 4ක පමණ කාලයක් ගතවනු ඇතැයි අපේක්ෂා කෙරේ.
ලෝක වෙළෙඳපොළේ මිල ගණන් උච්චාවචනය වන විට, අඩු මිලට ඉන්ධන මිලදී ගෙන රට තුළ විශාල වශයෙන් ගබඩා කර තබා ගැනීමට මෙමඟින් හැකියාව ලැබෙන බැවින්, මෙය ජාතික ආර්ථිකය ස්ථාවරව තබා ගැනීමට ඇති එකම පලිහ බව කුමාර ජයකොඩි මහතා වැඩිදුරටත් අවධාරණය කළේය.
