වෙනිසියුලාවේ බටහිර ප්රදේශයේ පිහිටි බරිනාස් අධිකරණ බන්ධනාගාරයේ (Barinas Judicial Internment Center) රඳවා සිටින සිරකරුවන් පිරිසක් ඉකුත් ඉරිදා (24) බන්ධනාගාරයේ වහලය මතට නැග දැවැන්ත විරෝධතාවක් ආරම්භ කර තිබේ.තමන්ව නිරායුධව සිටියදී බන්ධනාගාර ආරක්ෂක නිලධාරීන් විසින් වෙඩි තැබීම් සිදුකර ඇති බවත්, ඒ සඳහා වගකිවයුතු බන්ධනාගාර අධ්යක්ෂ එල්විස් මැකුවාරේ ගුරේරෝ (Elvis Macuare Guerrero) මහතාව වහාම එම තනතුරින් ඉවත් කරන ලෙසත් සිරකරුවන් මෙහිදී ඉල්ලා සිටියි. විරෝධතාවේ නිරත සිරකරුවන් විසින් බන්ධනාගාරය තුළ දැල්වූ මෙට්ට සහ වෙනත් ගිනි තැබීම් හේතුවෙන් බන්ධනාගාර පරිශ්රයෙන් ඝන දුමාරයක් පිටවනු දැකගත හැකි විය.වෙනිසියුලානු බන්ධනාගාර නිරීක්ෂණාගාරය (Venezuelan Prison Observatory) නමැති රාජ්ය නොවන සංවිධානය විසින් සමාජ මාධ්ය ඔස්සේ බෙදාගත් වීඩියෝවක, තම පපුවේ වෙඩි වැදී තුවාල ලබා සිටින සිරකරුවෙකු “අපට යුක්තිය අවශ්යයි, ආරක්ෂක නිලධාරීන් අපට වෙඩි තබනවා” යැයි පවසන ආකාරය දැකගත හැකිය.සිරකරුවන් චෝදනා කරන්නේ, තමන් සාමකාමීව විරෝධතාවේ නිරත වෙමින් සිටියදී බන්ධනාගාර කාර්ය මණ්ඩලය කිසිදු අනතුරු ඇඟවීමකින් තොරව වෙඩි තැබීම් සිදු කළ බවයි. තවද, බන්ධනාගාරය තුළ සිරකරුවන්ගේ ඇඳුම් පැහැර ගැනීම, නෑදෑ හිතමිතුරන් හමුවීමට අවසර නොදීම සහ මත්ද්රව්ය විකිණීම සඳහා බලපෑම් කිරීම වැනි බරපතළ මානව හිමිකම් උල්ලංඝනයන් සිදුවන බවද ඔවුන් පවසයි.මේ අතර, බන්ධනාගාරය පිටත රැස්ව සිටි සිරකරුවන්ගේ ඥාතීන් බන්ධනාගාරය තුළට ඇතුළු වීමට උත්සාහ කිරීමේදී ද කැරලි මර්දන නිලධාරීන් සමඟ ගැටුම් ඇති විය. බන්ධනාගාර බලධාරීන් මෙතෙක් මෙම සිද්ධිය සම්බන්ධයෙන් කිසිදු නිල ප්රකාශයක් සිදුකර නොමැත.
