ඔන්ලයින් ක්රීඩා උපකරණ අලෙවි කරන සමාගමක් ලෙස පෙනී සිටිමින් පුද්ගලයෙකුගේ බැංකු ගිණුමකින් රුපියල් 408,000ක මුදලක් වංචා කළ 22 හැවිරිදි සැකකරුවෙකු පොලිසිය විසින් අත්අඩංගුවට ගෙන ඇත.
වයඹ පළාත් පරිගණක අපරාධ විමර්ශන ඒකකය පැවසුවේ, මෙම සැකකරු අන්තර්ජාලය හරහා ක්රීඩා උපකරණ ඇණවුම් කිරීමට පාරිභෝගිකයා පොළඹවාගෙන මෙම වංචාව සිදුකර ඇති බවයි. පරිගණක වෛරසයක් (Trojan application) සහ ව්යාජ සබැඳියක් (Phishing link) භාවිතයෙන් පාරිභෝගිකයාගේ ජංගම දුරකථනයට දුරස්ථ ප්රවේශයක් ලබා ගනිමින් මෙම වංචාව සිදුකර ඇති බව විමර්ශනවලදී අනාවරණය වී ඇත.
පල්ලෙගම, මක්කනියගම ප්රදේශයේ පදිංචි 22 හැවිරිදි සැකකරු අත්අඩංගුවට ගෙන ඇති අතර, වයඹ පළාත් පරිගණක අපරාධ විමර්ශන ඒකකය සිද්ධිය සම්බන්ධයෙන් වැඩිදුර විමර්ශන සිදු කරයි. අන්තර්ජාලය භාවිත කිරීමේදී දැඩි අවධානයෙන් පසුවන ලෙසත්, සැකකටයුතු සබැඳි (Links) ක්ලික් කිරීමෙන් වළකින ලෙසත් ශ්රී ලංකා පොලිසිය මහජනතාවගෙන් ඉල්ලා සිටී.
