අද වන විට ගොවි ජනතාවට තමන් ලැබූ අස්වැන්න ඉහළ ස්ථාවර මිලකට විකුණාගත නොහැකි වී ඇති බැවින් ඔවුන් බරපතල විෂම චක්රයකට මුහුණ දී ඇති බව විපක්ෂ නායක සජිත් ප්රේමදාස මහතා පවසයි. බීජ, පොහොර සහ කෘමිනාශක මිල ඉහළ යාම, වන සත්ත්ව ගැටලුව සහ ඉඩෝරය වැනි ප්රශ්න රැසක් මැද ගොවියා අසරණ වී සිටින බව ඔහු පෙන්වා දෙයි. වත්මන් රජයේ බලධාරීන් මැතිවරණ සමයේදී වී සඳහා රුපියල් 150ක ස්ථාවර මිලක් ලබාදෙන බව ප්රකාශ කළ ද, අද වන විට පොහොර හිඟය මෙන්ම කෘෂිකර්මාන්තයේ කළුකඩ වෙළෙදාම ද බහුල වී ඇති බැවින් එදා රජ දවසේ මෙන් ගොවි ජනතාව රැකගැනීමට වහාම පියවර ගත යුතු බව විපක්ෂ නායකවරයා අවධාරණය කරයි.
පොළොන්නරුව, ඇලහැර රදවිගේඔය ජඹුරවෙළ ශ්රී මහින්දාරාම විහාරස්ථානයේ අභිනවයෙන් ඉදිකිරීමට යෝජිත චෛත්ය රාජයාණන් වහන්සේගේ මුල් ගල් තැබීමේ පුණ්ය උත්සවයට ඊයේ (30) එක්වෙමින් විපක්ෂ නායකවරයා මේ බව කියා සිටියේය. එහිදී වැඩිදුරටත් අදහස් දැක්වූ ඒ මහතා, වෙහෙර විහාර ඉදිකිරීම තුළින් ‘වැවයි දාගැබයි ගමයි පන්සලයි’ සංකල්පය නැවත තහවුරු වන අතරම සුචරිතවත්, දැහැමි පුරවැසි පරපුරක් සහිත රටක් නිර්මාණය කිරීමට මග පෑදෙන බව ද පැවසීය. එමෙන්ම ඇතැම් පාර්ශ්ව නවීන න්යායන් පෙන්වමින් ගොවිතැන පාඩු ලබන රැකියාවක් ලෙස හුවාදැක්වීමට උත්සාහ කළ ද, නිසි තාක්ෂණික ක්රමවේද උපයෝගී කරගනිමින් නිෂ්පාදනය ඉහළ නැංවීම හරහා කෘෂිකර්මාන්තය ලාභ ලබන ක්ෂේත්රයක් බවට පත්කළ හැකි බව ද සජිත් ප්රේමදාස මහතා මෙහිදී ප්රකාශ කළේය.
