2026 ෆිෆා (FIFA) ලෝක කුසලාන පාපන්දු තරඟාවලිය සඳහා සහභාගී වීමට නියමිත දකුණු අප්රිකානු සංචිතයේ මෙක්සිකානු වීසා බලපත්ර ප්රමාද වීම හේතුවෙන් ඔවුන්ගේ පිටත්ව යාම අත්හිටුවීමට සිදුව ඇති බව දකුණු අප්රිකානු පාපන්දු සංගමය (SAFA) පවසයි. තරඟාවලියේ සම සත්කාරකත්වය දරන මෙක්සිකෝව සහ දකුණු අප්රිකාව අතර සමාරම්භක තරඟය පැවැත්වීමට තවත් දින 11ක් වැනි කෙටි කාලයක් ඉතිරිව තිබියදී මෙම අර්බුදය නිර්මාණය වී ඇත.
‘බෆානා බෆානා’ (Bafana Bafana) යන අන්වර්ථ නාමයෙන් හැඳින්වෙන දකුණු අප්රිකානු ජාතික පිරිමි පාපන්දු කණ්ඩායම ජොහැනස්බර්ග් නුවරින් විශේෂ ගුවන් යානයක් මඟින් අද (31) උදෑසන මෙක්සිකෝ සිටි බලා පිටත්ව යාමට නියමිතව තිබුණ ද, ඇතැම් ක්රීඩකයින්ගේ සහ නිලධාරීන්ගේ වීසා බලපත්ර මෙතෙක් ලැබී නොමැති බැවින් ඔවුන්ට මෙසේ මෙරට රැඳී සිටීමට සිදුව තිබේ.
කෙසේ වෙතත්, කණ්ඩායම කඩිනමින් මෙක්සිකෝව බලා පිටත් කර හැරීමට අවශ්ය කටයුතු සිදු කරමින් පවතින බවත්, වීසා ලැබෙන තෙක් ක්රීඩකයින් ජොහැනස්බර්ග් නුවරදීම පුහුණුවීම් කටයුතු අඛණ්ඩව සිදු කරන බවත් එරට පාපන්දු සංගමය නිවේදනය කර ඇත. මේ අතර, දකුණු අප්රිකානු ක්රීඩා අමාත්ය ගේටන් මැකෙන්සි (Gayton McKenzie) මහතා මෙම සිදුවීම “ලැජ්ජාසහගත සහ අතිශය අසාධාරණ” තත්ත්වයක් ලෙස දැඩිව හෙළා දැක ඇති අතර, ඒ පිළිබඳ සාකච්ඡා කිරීමට අද පස්වරුවේ හදිසි කමිටු රැස්වීමක් ද කැඳවා තිබේ.
