මැදපෙරදිග කලාපයේ පවතින බරපතළ ආරක්ෂක තත්ත්වය සහ උපායමාර්ගික සබඳතා තවදුරටත් ශක්තිමත් කරමින්, ලෙබනන් සන්නද්ධ බලකායේ ප්රධාන අණදෙන නිලධාරී ජෙනරාල් රුඩොල්ෆ් හයිකල් (General Rudolph Haykal) මහතා නිල සංචාරයක් සඳහා හදිසියේම පාකිස්තානය බලා පිටත්ව ගොස් තිබේ. පාකිස්තාන යුධ හමුදා මාණ්ඩලික ප්රධානී ෆීල්ඩ් මාර්ෂල් සයිඩ් අසීම් මුනීර් (Field Marshal Syed Asim Munir) මහතා විසින් කරන ලද විශේෂ නිල ආරාධනයකට අනුව මෙම ඉහළ පෙළේ ආරක්ෂක සංචාරය සිදුවන බව ලෙබනන් හමුදා නිල ට්විටර් ගිණුම තහවුරු කරයි.
මෙම සංචාරයේ වඩාත්ම සුවිශේෂී සහ ආන්දෝලනාත්මක කරුණ වන්නේ, පසුගිය කාලසීමාව පුරා මැදපෙරදිග කලාපය ලේ විලක් කළ ලෙබනන් අර්බුදය සහ දරුණු යුධ ගැටුම් නිමා කරමින් ඓතිහාසික සටන් විරාම ගිවිසුම ඇති කිරීම සඳහා ප්රධානතම මැදිහත්කරු ලෙස කටයුතු කරනු ලැබුවේ පාකිස්තානය වීමයි. මෙම සමස්ත අර්බුදකාරී ක්රියාවලිය පුරාම ගැටුමට සම්බන්ධ සියලුම පාර්ශවයන් සහ බහුජාතික බලවතුන් අතර රහසිගත සන්නිවේදන ජාලය (Primary Back Channel) සාර්ථකව හසුරුවන ලද්දේ ද පාකිස්තාන ආරක්ෂක අංශ විසින් බව මේ වන විට විදේශ මාධ්ය මගින් ප්රසිද්ධියට පත් කර ඇත.
කලාපීය සාමය ස්ථාපිත කිරීමෙන් අනතුරුව ලෙබනන් සහ පාකිස්තාන හමුදා ප්රධානීන් අතර සිදුවන මෙම ප්රථම ඍජු හමුව හරහා ඉදිරි ආරක්ෂක සහයෝගීතාවය, ප්රතිසංස්කරණ සහ කලාපීය ස්ථාවරත්වය පිළිබඳව තීරණාත්මක එකඟතාවන් රැසකට එළඹීමට නියමිතය.
