රජයේ මුදල් කාරක සභාව තුළ සිදුකෙරුණු හැකර්වරුන් පිළිබඳ පරීක්ෂණවලට අදාළ වීඩියෝ පට මාධ්ය වෙත මුදාහැරීමට කටයුතු කළහොත්, එම කාරක සභාවේ සභාපති හර්ෂ ද සිල්වා මහතාව එම ධුරයෙන් ඉවත් කරන බවට ආණ්ඩු පක්ෂයේ බහුතරයක් මන්ත්රීවරුන් තර්ජනය කර ඇති බව හිටපු පාර්ලිමේන්තු මන්ත්රී අජිත් පී. පෙරේරා මහතා පවසයි.
පෞද්ගලික රූපවාහිනී නාලිකාවක පැවති දේශපාලන වැඩසටහනකදී ඒ මහතා කළ හෙළිදරව්වෙහි අඩංගු කරුණු කිහිපයක් පහත දැක්වේ.
සාමාන්ය ක්රමවේදය වන්නේ සියලු සාකච්ඡා විනිවිදභාවයකින් යුතුව ජනතාවට දැනගැනීම සඳහා පාර්ලිමේන්තුව හරහා නිකුත් කිරීම වුවත්, ආණ්ඩු පක්ෂ මන්ත්රීවරුන්ගේ දැඩි විරෝධය සහ බලපෑම නිසා වත්මන් මූල්ය විමර්ශනවලට අදාළ වීඩියෝ පට නිකුත් කිරීම මේ වන විට නතර වී තිබේ. කමිටුවේ විපක්ෂ සාමාජිකයන් සිව්දෙනෙකු පමණක් සිටියදී ආණ්ඩු පක්ෂයේ සාමාජිකයන් 16 දෙනෙකු සිටින නිසා, ඔවුන් බහුතර බලය යොදා ගනිමින් හර්ෂ ද සිල්වා මහතාගේ තනි තීරණයකට වැඩ කිරීමට ඇති හැකියාව අහුරා ඇත. විශේෂයෙන්ම මහා භාණ්ඩාගාර ලේකම්වරයා සහ මහ බැංකු අධිපතිවරයා සහභාගි වූ වැදගත් සාකච්ඡා දෙකක වීඩියෝ පට මුදාහැරීම මෙලෙස වළක්වා ඇත.
මෙවැනි තර්ජනවලට බිය නොවන හර්ෂ ද සිල්වා මහතා, “එහෙනම් මාව අස් කරන්න, මම ලෑස්තියි යන්න” යනුවෙන් සෘජුවම ප්රකාශ කර ඇත. මීට පෙර ගල්අඟුරු ගනුදෙනුවක් හෙළිදරව් කිරීමේදී ද මෙවැනිම තත්ත්වයකට ඔහු මුහුණ දුන්නේය. අස්ථානගත වූ ඩොලර් මිලියන 2.5ක මුදල පිළිබඳව කාරක සභාවේදී සාකච්ඡා වී ඇති අතර, එම මුදල සොයා ගැනීමට නොහැකි වුවහොත් එහි සමස්ත පාඩුව රටේ සාමාන්ය ජනතාවට දැරීමට සිදුවන බව මහා භාණ්ඩාගාර ලේකම්වරයා ද පිළිගෙන ඇත.
පුරවැසියන්ට සත්ය දැනගැනීමේ අයිතියක් ඇති බැවින්, මෙම වීඩියෝ පට සාමාන්ය ක්රමවේදය යටතේ වහාම මුදාහරින ලෙස අජිත් පී. පෙරේරා මහතා ආණ්ඩුවට අභියෝග කළේය.
