ජාතික හැඳුනුම්පත් (NIC) නොමැති වීම, දත්ත එකතු කිරීමේ අඩුපාඩු සහ පද්ධතිගත තාක්ෂණික ගැටලු හේතුවෙන් සුදුසුකම් ලත් පුරවැසියන්ට රජයේ සුබසාධන වැඩසටහන් වෙත ප්රවේශ වීමේදී බාධා මතු වී තිබේ.
මෙම තත්ත්වය සම්බන්ධයෙන් අදාළ අංශ විසින් පෙන්වා දී ඇති ප්රධාන කරුණු කිහිපයක් පහත දැක්වේ:
අස්වැසුම, ආබාධිත, වැඩිහිටි සහ වකුගඩු රෝගී දීමනා ඇතුළු රජයේ සුබසාධන වැඩසටහන් සඳහා සුදුසුකම් ලත් ඕනෑම පුරවැසියෙකුට ඕනෑම වේලාවක අයදුම් කළ හැකි විවෘත සමාජ ආරක්ෂණ පද්ධතියක් ලබන වසර (2027) වන විට ස්ථාපිත කිරීමට රජය සැලසුම් කර ඇත.
ආබාධිත දීමනා ලබන පුද්ගලයින් 175,684 දෙනෙකු සිටියද, ඉන් ප්රතිලාභී දත්ත පද්ධතියට ඇතුළත් කර ඇත්තේ පුද්ගලයින් 105,672ක් (60.15%) පමණි. බොහෝ පිරිසක් තවමත් දත්ත පද්ධතියට එක් නොවීමට ප්රධාන හේතුව වී ඇත්තේ ජාතික හැඳුනුම්පත් නොමැති වීම සහ දත්ත එකතු කිරීමේ අසම්පූර්ණකම්ය. දැනට තැපැල් කාර්යාල හරහා දීමනා ගෙවනු ලැබුවද, අනාගතයේදී කෙලින්ම බැංකු ගිණුම් වෙත මුදල් බැර කිරීමට රජය අපේක්ෂා කරයි.
ආබාධිත දීමනා සඳහා මාසික ඒක පුද්ගල ආදායම රුපියල් 16,191ට වඩා අඩු පවුලක සාමාජිකයෙකු විය යුතු අතර රජයේ වෛද්ය නිලධාරියෙකුගේ වෛද්ය වාර්තාවක් අවශ්ය වේ. වකුගඩු රෝගී දීමනාව (රු. 10,000) සඳහා ග්ලෝමියුලර් පෙරීමේ අනුපාතය (GFR) 30ට අඩු රෝගීන් සහ රුපියල් 16,191ට අඩු ආදායම් ලබන පවුල්වල අය සුදුසුකම් ලබයි.
වයස අවුරුදු 70 සහ ඊට වැඩි පුද්ගලයින් 698,000ක් පමණ දැනට මෙම පද්ධතිය හරහා දීමනා ලබයි. කෙසේ වෙතත්, හැඳුනුම්පත් නොමැති වීම නිසා තවත් වැඩිහිටියන් 107,000ක් පමණ දීමනා ලබාගැනීමේ ගැටලුවලට මුහුණ දී සිටිති. මෙයට විසඳුමක් ලෙස ලියාපදිංචි නොවූ වැඩිහිටියන් නැවත අයදුම් කිරීමේ ක්රියාවලියක් ඔස්සේ දත්ත පද්ධතියට ඇතුළත් කිරීමට පියවර ගෙන ඇත.
