ලෙබනනය, සිරියාව සහ ගාසා තීරය තුළ තමන් විසින් ස්ථාපිත කර ඇති ආරක්ෂිත කලාප තුළ ඊශ්රායල සන්නද්ධ බලකායන් දිගින් දිගටම රඳවා තබා ගැනීමට තම රජය දැඩි තීරණයක් ගෙන ඇති බව ඊශ්රායල ආරක්ෂක අමාත්ය ඊශ්රායල් කැට්ස් ඇමරිකානු ආරක්ෂක ලේකම් (පීට් හෙග්සෙත් වෙත නිල වශයෙන් දැනුම් දී තිබේ. ජාත්යන්තර මාධ්ය වාර්තා සනාථ කරන්නේ දෙරටේ ආරක්ෂක ප්රධානීන් අතර රාත්රී කාලයේ පැවැති විශේෂ දුරකථන සාකච්ඡාවකදී ඊශ්රායල ආරක්ෂක අමාත්යවරයා මෙම ස්ථාවරය අවධාරණය කර ඇති බවයි. ත්රස්තවාදී සහ සන්නද්ධ කණ්ඩායම්වලින් එල්ල වන තර්ජනවලින් ඊශ්රායල දේශසීමා සහ සිවිල් ජනාවාස ආරක්ෂා කර ගැනීම සඳහා මෙම ආරක්ෂිත කලාප තුළ හමුදා රඳවා තැබීම අත්යවශ්ය බව ඊශ්රායලය පෙන්වා දෙයි.
මෙම නිල ප්රකාශය නිකුත් වී ඇත්තේ සිරියාවෙන් සහ ලෙබනනයෙන් සිය හමුදාවන් ඉවත් කරගන්නා ලෙස ඇමරිකානු ජනාධිපති ඩොනල්ඩ් ට්රම්ප් විසින් ඊශ්රායල අග්රාමාත්ය බෙන්ජමින් නෙදන්යාහුගෙන් ඉල්ලා ඇති බවට ජාත්යන්තර මාධ්ය වාර්තා පළ වූ පසුබිමක වීම විශේෂත්වයකි. කලාපීය ආතතිය තීව්ර වීමට ඊශ්රායල හමුදා රැඳී සිටීම හේතු වන බව ඇමරිකානු පාර්ශ්වය පෙන්වා දුන්නද, ආරක්ෂක අමාත්ය කැට්ස් සඳහන් කර ඇත්තේ ඊශ්රායලය සිය දේශසීමා ආරක්ෂා කර ගැනීම සඳහා කිසිවිටෙකත් ඇමරිකානු හමුදාවන්ගේ සෘජු දායකත්වයක් ඉල්ලා නොමැති බවත්, තම ආරක්ෂාව තහවුරු කර ගැනීම තමන් සතු වගකීමක් බවත්ය. ඊශ්රායලය මේ වන විට ගාසා තීරයේ සැලකිය යුතු ප්රදේශයක් මෙන්ම ලෙබනන් දේශසීමාවෙන් ඇතුළත කිලෝමීටර් 10ක පමණ ආරක්ෂිත කලාපයක් ද, සිරියාවේ දකුණු දිග දේශසීමා කලාප ද සිය මිලිටරි පාලනය යටතට ගෙන තිබේ.
ඇමරිකාව මැදිහත් වෙමින් ලෙබනනය සහ ඊශ්රායලය අතර ගැටුම් නිමා කිරීම සඳහා රෝම නුවරදී විශේෂ සාකච්ඡා වට පවත්වමින් සිටින වටපිටාවක, ඊශ්රායලය ගෙන ඇති මෙම දැඩි මිලිටරි ස්ථාවරය හේතුවෙන් යෝජිත සාම ගිවිසුම් සහ රාජ්ය තාන්ත්රික ප්රයත්නයන් තවදුරටත් අර්බුදකාරී මුහුණුවරක් ගනු ඇතැයි භූ-දේශපාලන විචාරකයෝ පවසති. මැදපෙරදිග කලාපයේ පවතින වත්මන් යුදමය තත්ත්වය සහ ඊශ්රායලයේ මෙම තීරණයට ප්රතිචාර වශයෙන් ඇමරිකානු පෙන්ටගනය සහ සෙසු කලාපීය බලවතුන් ගන්නා ඉදිරි උපායමාර්ගික පියවර පිළිබඳ තොරතුරු ඉදිරියේදී අනාවරණය වනු ඇතැයි අපේක්ෂා කෙරේ.
