සමාජ මාධ්ය ඔස්සේ සංසරණය වන අම්බලන්ගොඩ පොලිස් ස්ථානය තුළ සිදු වූ බව කියන සිදුවීමක් දැක්වෙන වීඩියෝවක් සම්බන්ධයෙන් පොලිසිය විසින් පුළුල් පරීක්ෂණයක් ආරම්භ කර තිබේ. පොලිස්පතිවරයාගේ නියෝගය මත මෙම විමර්ශනය ක්රියාත්මක වන අතර, ගාල්ල දිශාව භාර නියෝජ්ය පොලිස්පතිවරයාගේ අධීක්ෂණය යටතේ, එල්පිටිය පොලිස් කොට්ඨාසයෙන් බැහැර ජ්යෙෂ්ඨ පොලිස් නිලධාරියෙකු විසින් මෙය මෙහෙයවනු ලැබේ.
මෙම වීඩියෝව මගින් අනාවරණය වන්නේ සිය පියාට පොලිස් නිලධාරීන් විසින් පහර දී ඇති බවට චෝදනා කරමින් පුද්ගලයෙකු පොලිස් ස්ථානය තුළ ආක්රමණශීලී ලෙස හැසිරෙන අයුරුය. අදාළ වීඩියෝව මේ වන විට සමාජ මාධ්ය තුළ දැඩි ලෙස සංසරණය වෙමින් පවතී.
සිද්ධිය සම්බන්ධයෙන් පොලිස් පාර්ශ්වය ප්රකාශ කරන්නේ අගෝස්තු 24 වන දින රාත්රියේ බීමත්ව මහමඟ අწනයට බාධා වන අයුරින් හැසිරුණු වයස්ගත පුද්ගලයෙකු අම්බලන්ගොඩ පොලිසිය විසින් අත්අඩංගුවට ගත් බවයි. අත්අඩංගුවට ගැනීමේදී ඔහු පලා යාමට උත්සාහ කිරීමේදී බිම ඇඳ වැටී ඇති බවත්, වීඩියෝවේ දැක්ෙන ලේ ගැලීම් සහ තුවාල එම වැටීමෙන් සිදුවූ ඒවා බවත් පොලිසිය පවසයි.
කෙසේ වෙතත්, අත්අඩංගුවටගත් රාත්රියේදී තම පියාට පොලිස් නිලධාරීන් විසින් දැඩි ලෙස පහර දී ඇති බව ඔහුගේ පුත්රයා චෝදනා කරයි. නිවෙස අසලදී හැඳුනුම්පත ඉල්ලා සිටි අවස්ථාවේ, එය රැගෙන ඒමට නිවසට යාමට අවසර නොදී, තම පියාට අපහාස කර, පොලිස් ස්ථානය තුළදී පහර දී, ගිනි අවියකින් තර්ජනය කර ප්රතිකාර ලබාදීම වළක්වා ඇති බව ඔහු පවසයි.
අම්බලන්ගොඩ පොලිසිය විසින් අගෝස්තු 25 වන දින අදාළ පුද්ගලයා බලපිටිය රෝහලට රැගෙන ගොස් අධිකරණ වෛද්ය නිලධාරීවරයා හමුවට ඉදිරිපත් කර ඇති අතර, පසුව ඔහු බලපිටිය අතිරේක මහේස්ත්රාත් හමුවට ඉදිරිපත් කිරීමෙන් අනතුරුව ඇප මත මුදා හැර ඇත. සිද්ධිය සම්බන්ධයෙන් වැඩිදුර පරීක්ෂණ ක්රියාත්මක වේ.
