උස්බෙකිස්තානයේ ටෂ්කන්ට් නුවර පැවැත්වෙන ආසියානු මේස පන්දු ශූරතාවලියට සහභාගී වන ශ්‍රී ලංකා පිරිමි හා කාන්තා කණ්ඩායම් ක්‍රීඩා අමාත්‍ය සුනිල් කුමාර ගමගේ මහතා හමුවී තිබේ. මෙම හමුව ඊයේ (13) තරුණ කටයුතු හා ක්‍රීඩා අමාත්‍යාංශයේදී පැවැත්වුණි.
ආසියානු මේස පන්දු සංගමය (Asian Table Tennis Union) සහ ජාත්‍යන්තර මේස පන්දු සම්මේලනය (International Table Tennis Federation) එක්ව සංවිධානය කරන මෙම තරගාවලිය ආසියානු කලාපයේ ප්‍රධාන වාර්ෂික මේස පන්දු තරගාවලියක් වන අතර, 2027 ලෝක මේස පන්දු ශූරතාවලිය සඳහා සුදුසුකම් ලබාගැනීමේ තරගාවලියක් ලෙසද වැදගත් වේ.
ශ්‍රී ලංකා පිරිමි කණ්ඩායමට චමීර ගිනිගේ (නායක), චනුල් දුල්සෙන්, නුවන්තා නිරෝෂණ සහ සෙනුර සිල්වා ඇතුළත් වන අතර, කාන්තා කණ්ඩායම බිමන්දී බණ්ඩාර (නායිකා), තමදී කාවින්ද්‍යා, මනීෂා ශාලින්දි සහ ශමල්ෂා පෙරේරා යන ක්‍රීඩිකාවන්ගෙන් සමන්විත වේ.
මෙම ශූරතාවලියේදී කණ්ඩායම් තරග, පිරිමි හා කාන්තා කේවල, පිරිමි හා කාන්තා යුගල සහ මිශ්‍ර යුගල යන ඉසව් පැවැත්වීමට නියමිතය.
ජාත්‍යන්තර තරගාවලියකදී ශ්‍රී ලංකාව නියෝජනය කරන ක්‍රීඩක ක්‍රීඩිකාවන්ට සිය දක්ෂතා උපරිමයෙන් ප්‍රදර්ශනය කරමින් රටට කීර්තියක් අත්කර ගැනීමට හැකි වේවායි ක්‍රීඩා අමාත්‍යවරයා මෙහිදී සුබ පැතුම් එක් කර තිබේ.
