දිවයින පුරා පසුගිය සති කිහිපය තුළ ඉන්ෆ්ලුවෙන්සා රෝගී තත්ත්වයන්ගේ ඉහළ යාමක් වසංගත රෝග විද්‍යා අංශයේ ආවේක්ෂණ පද්ධති මඟින් අනාවරණය කර තිබේ. සෞඛ්‍ය ප්‍රවර්ධන කාර්යාංශයේ පැවැති විශේෂ මාධ්‍ය හමුවකට එක්වෙමින් ප්‍රධාන වසංගත රෝග විද්‍යාඥ, විශේෂඥ වෛද්‍ය පාලිත කරුණාපේම මහතා පෙන්වා දුන්නේ පසුගිය සතියේ පරීක්ෂාවට ලක් කළ සාම්පල වලින් ආසන්න වශයෙන් 35% ක ප්‍රතිශතයක් ඉන්ෆ්ලුවෙන්සා රෝගීන් බවට තහවුරු වී ඇති බවයි. කෙසේ වෙතත්, සාමාන්‍ය ප්‍රතිකාර මඟින් දින තුන හතරක් තුළ මෙම තත්ත්වය සම්පූර්ණයෙන්ම සුව අතට හැරෙන බැවින් ජනතාව මේ සම්බන්ධයෙන් අනියත බියක් ඇති කරගත යුතු නැති බව හෙතෙම අවධාරණය කළේය.
සාමාන්‍ය ජනතාවට බරපතල තත්ත්වයක් නොමැති වුවද, ගර්භනී මව්වරුන්, කුඩා දරුවන්, වැඩිහිටියන් මෙන්ම දියවැඩියාව සහ හෘදරෝග වැනි නිදන්ගත බෝ නොවන රෝගවලින් පෙළෙන පුද්ගලයන් ඉන්ෆ්ලුවෙන්සා ආසාදනයට ලක්වීමෙන් සංකූලතා ඇතිවීමේ වැඩි අවදානමක් පවතින බව සෞඛ්‍ය අංශ පෙන්වා දෙයි. කැස්ස, සෙම්ප්‍රතිශ්‍යාව සහ උණ වැනි රෝග ලක්ෂණ මතු වූ විට නිවෙසේ විවේකීව සිටීම, නිතර සබන් යොදා අත් සේදීම සහ රෝගී තත්ත්වයන් පවතින අවස්ථාවලදී මුඛ ආවරණ පැළඳීම මඟින් රෝගය සමාජය තුළ පැතිරීම පුළුල් ලෙස පාලනය කරගත හැකි බව විශේෂඥයෝ පෙන්වා දෙති.
ඉන්ෆ්ලුවෙන්සා ව්‍යාප්තිය පාලනය කිරීම සඳහා සෞඛ්‍ය අංශ විසින් ලබා දී ඇති නිවාරණ මාර්ගෝපදේශ නිසි ලෙස අනුගමනය කිරීම වත්මන් තත්ත්වය හමුවේ අතිශයින් තීරණාත්මක වේ. ඉදිරි සති කිහිපය තුළත් ශවසන ආසාදන තත්ත්වයන් පිළිබඳව දැඩි අවධානයෙන් පසුවන ලෙස සෞඛ්‍ය අංශ ජනතාවගෙන් ඉල්ලා සිටින අතර, රෝග ලක්ෂණ දරුණු අතට හැරේ නම් හෝ හුස්ම ගැනීමේ අපහසුතා මතු වේ නම් වහාම වෛද්‍ය උපදෙස් ලබාගැනීමට කටයුතු කළ යුතුය.
