පොදුරාජ්‍ය මණ්ඩලීය පාර්ලිමේන්තු සංගමය (CPA) සංවිධානය කරන උසස් පාර්ලිමේන්තු සංවර්ධන නේවාසික වැඩසටහන ඔක්තෝබර් 12 සිට 16 දක්වා ගර්න්සි දූපතේ ශාන්ත පීටර් පෝට් නගරයේදී පැවැත්වේ.
CPA පාර්ලිමේන්තු ඇකඩමිය විසින් ගර්න්සි පාර්ලිමේන්තුව වන States of Deliberation හි සහාය ඇතිව සංවිධානය කර ඇති මෙම වැඩසටහනට පොදුරාජ්‍ය මණ්ඩලීය ව්‍යවස්ථාදායක නියෝජනය කරන රටවල් සහ ප්‍රදේශ රැසක මන්ත්‍රීවරුන් 30 දෙනෙකු පමණ සහභාගී වෙති.
ශ්‍රී ලංකාව නියෝජනය කරමින් ගම්පහ දිස්ත්‍රික් පාර්ලිමේන්තු මන්ත්‍රී වෛද්‍ය කවින්ද ජයවර්ධන සහ ජනමාධ්‍ය නියෝජ්‍ය අමාත්‍ය, කොළඹ දිස්ත්‍රික් පාර්ලිමේන්තු මන්ත්‍රී ආචාර්ය කෞශල්‍යා ආරියරත්න මෙම වැඩසටහනට එක්ව සිටිති.
නීති සම්පාදන අධීක්ෂණය, කාරක සභා කටයුතු, සන්නිවේදනය සහ 21 වැනි සියවසේ මන්ත්‍රීවරයාගේ කාර්යභාරය පිළිබඳව මෙම දින පහක වැඩසටහනේදී අවධානය යොමු කෙරේ.
වැඩසටහනේ කොටසක් ලෙස ගර්න්සි පාර්ලිමේන්තුවේ මන්ත්‍රී පුරප්පාඩු අතුරු මැතිවරණයකින් පිරවිය යුතු අවස්ථා පිළිබඳ නීති සංශෝධන කෙටුම්පතක් සම්බන්ධයෙන් ආදර්ශ පාර්ලිමේන්තු විවාදයක්ද පවත්වා තිබේ. එහිදී විපක්ෂය වෙනුවෙන් අදහස් දැක්වූ වෛද්‍ය කවින්ද ජයවර්ධන පෙන්වා දී ඇත්තේ පුරප්පාඩු දිගටම පැවතීමෙන් ඡන්දදායකයන්ගේ නියෝජනය සහ පාර්ලිමේන්තු අධීක්ෂණය දුර්වල විය හැකි බවයි.
ශ්‍රී ලංකාවේ පාර්ලිමේන්තු පුරප්පාඩු පිරවීමේ ක්‍රමවේදය පිළිබඳ අත්දැකීම්ද ඉදිරිපත් කළ ඔහු, ගර්න්සි සඳහා ඉක්මන්, සාධාරණ සහ අඩු වියදම් විකල්පයක් ලෙස “කවුන්ට්බැක්” (countback) ක්‍රමය යෝජනා කර තිබේ.
මෙම අභ්‍යාසයේදී ශ්‍රී ලංකාවේ ආණ්ඩු පක්ෂය සහ විපක්ෂය නියෝජනය කරන මන්ත්‍රීවරුන් දෙදෙනාම විපක්ෂ ආසනවල සිට එක්ව අදහස් දැක්වීම විශේෂත්වයකි.
මාර්ගෝපදේශන සැසි, කාරක සභා අභ්‍යාස සහ ගර්න්සි පාර්ලිමේන්තු ආයතන සමඟ සම්බන්ධීකරණය ඇතුළත් මෙම වැඩසටහනේ ප්‍රධාන අරමුණ පොදුරාජ්‍ය මණ්ඩලය පුරා මන්ත්‍රීවරුන් අතර සහයෝගීතාව සහ දිගුකාලීන සබඳතා ශක්තිමත් කිරීමයි.
