කොළඹ වරාය නගර ආර්ථික කොමිෂන් සභාවේ නිර්දේශ මත විදේශිකයන්ට වීසා 14,300ක් පමණ නිකුත් කර ඇති බව අනාවරණය වීමත් සමඟ, එම විදේශිකයන්ගේ කටයුතු අධීක්ෂණය කිරීමේ ක්‍රමවේද පිළිබඳව පාර්ලිමේන්තුවේ රාජ්‍ය මුදල් පිළිබඳ කාරක සභාව අවධානය යොමු කර තිබේ.
පාර්ලිමේන්තු නිවේදනයකට අනුව, ආචාර්ය හර්ෂ ද සිල්වා මහතාගේ සභාපතිත්වයෙන් ඔක්තෝබර් 8 වැනිදා පැවති කාරක සභා රැස්වීමේදී මේ සම්බන්ධයෙන් සාකච්ඡා කර ඇත.
වරාය නගර කොමිෂන් සභාවේ නිර්දේශ මත වීසා ලබාගත් විදේශීය සේවකයන්ගේ ක්‍රියාකාරකම් මෙරට තුළ අධීක්ෂණය කිරීමේ ප්‍රායෝගික හැකියාව සහ ඒ සඳහා පවතින ක්‍රමවේද පිළිබඳව කාරක සභා සාමාජිකයන් එහිදී කරුණු විමසා තිබේ. වරාය නගරය තුළ නීතිවිරෝධී ක්‍රියා වැළැක්වීම සහ ශ්‍රී ලංකාවේ ජාත්‍යන්තර කීර්තිනාමය ආරක්ෂා කිරීම සඳහා නියාමන ක්‍රියාමාර්ග ශක්තිමත් කිරීමේ අවශ්‍යතාවද අවධාරණය කර ඇත.
එමෙන්ම, වරාය නගරයේ ආයෝජනය කරන සමාගම්වල සැබෑ ප්‍රතිලාභ හිමිකරුවන් හඳුනාගැනීම, විදේශ ආයෝජනවල විනිවිදභාවය තහවුරු කිරීම සහ මුදල් විශුද්ධිකරණය හා ත්‍රස්තවාදී මූල්‍යකරණය වැළැක්වීම සඳහා පවතින ක්‍රමවේද පිළිබඳවද සාමාජිකයන් ප්‍රශ්න කර තිබේ.
වරාය නගරයේ ආයෝජන ව්‍යාපෘතිවල ප්‍රගතිය සම්බන්ධයෙන්ද මෙහිදී කරුණු ඉදිරිපත් වී ඇත. ඒ අනුව, ඇමෙරිකානු ඩොලර් බිලියන 1.12ක් පමණ වටිනා භූමි කොටස් නවයක් මේ වනවිට වසර 99ක කාලයක් සඳහා බදු දී ඇති අතර, තවත් ඇමෙරිකානු ඩොලර් බිලියන 1ක පමණ වටිනාකමකින් යුත් භූමි කොටස් හයක් බදු දීමට සැලසුම් කර තිබේ. රජයට අයත් තවත් භූමි කොටස් හතරක් වෙළෙඳපොළට ඉදිරිපත් කිරීම සඳහා සූදානම් කරමින් පවතින බවද නිලධාරීන් සඳහන් කර ඇත.
නිලධාරීන්ට අනුව, අදාළ භූමි කොටස් වර්ග මීටරයකට ඇමෙරිකානු ඩොලර් 3,000ක සාමාන්‍ය වටිනාකමකට බදු දී තිබේ. වරාය නගරය තුළ ව්‍යාපාර පවත්වාගෙන යාමට අනුමැතිය ලැබූ ආයතන සිය මෙහෙයුම් ආරම්භ කර තිබේද, අපේක්ෂිත විදේශ ආයෝජන සහ රැකියා අවස්ථා උදා වී තිබේද යන්න පිළිබඳවද කාරක සභාව විමසා ඇත.
තවද, කොන්ඩෝමිනියම් නිවාස ඒකක මිලදී ගන්නා ආයෝජකයන් තැන්පත් කරන මුදල් ආරක්ෂා කිරීම සහ එම මුදල් අදාළ සංවර්ධන ව්‍යාපෘති සඳහා පමණක් යොදාගැනීම තහවුරු කිරීමට Escrow ගිණුම් භාවිත කිරීමේ වැදගත්කම පිළිබඳවද සාකච්ඡා කර තිබේ.
මෙම සාකච්ඡාවට නියෝජ්‍ය අමාත්‍යවරුන් වන චතුරංග අබේසිංහ සහ නිශාන්ත ජයවීර මහත්වරුන් ඇතුළු ආණ්ඩු පක්ෂයේ සහ විපක්ෂයේ මන්ත්‍රීවරුන් පිරිසක් සහභාගී වී ඇත.
