යෝජිත අධ්‍යාපන ප්‍රතිසංස්කරණ පිළිබඳ නිවැරදි තොරතුරු ජනතාවට ලබාදීම සහ ඒ සම්බන්ධයෙන් මහජනතාවට ඇති ප්‍රශ්නවලට පිළිතුරු සැපයීම සඳහා නව නිල වෙබ් අඩවියක් හඳුන්වා දී තිබේ.
Reform Information & Enquiry Service (RIES) ලෙස නම් කර ඇති මෙම වෙබ් අඩවිය අග්‍රාමාත්‍ය සහ අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍ය හරිනි අමරසූරිය මහත්මියගේ සහභාගීත්වයෙන් ඊයේ (14) අරලියගහ මන්දිරයේදී නිල වශයෙන් විවෘත කර ඇත.
වෙබ් අඩවියට පිවිසීම සඳහා: https://edureformfact.moe.gov.lk
නව අධ්‍යාපන ප්‍රතිසංස්කරණ ක්‍රියාත්මක කිරීම සම්බන්ධයෙන් විද්‍යුත් හා මුද්‍රිත මාධ්‍ය ආයතන ප්‍රධානීන් සමඟ පැවති සාකච්ඡාවක් අතරතුර මෙම වෙබ් අඩවිය හඳුන්වා දී තිබේ. යෝජිත වෙනස්කම් පිළිබඳ නිවැරදි තොරතුරු ලබාගැනීමටත්, ඒ සම්බන්ධයෙන් තම ප්‍රශ්න ඉදිරිපත් කිරීමටත් ජනතාවට මෙහිදී අවස්ථාව සැලසේ.
අග්‍රාමාත්‍යවරිය සඳහන් කළේ මෙම ප්‍රතිසංස්කරණ පාසල් විෂයමාලාව වෙනස් කිරීමකට පමණක් සීමා නොවී සමස්ත අධ්‍යාපන පද්ධතියම පරිවර්තනය කිරීමේ වැඩපිළිවෙළක් බවයි. ප්‍රතිසංස්කරණවල පළමු අදියර 2026 වසරේදී පළමු ශ්‍රේණියෙන් ආරම්භ කර ඇති අතර, 2027 වසරේදී හයවන ශ්‍රේණියටද එය හඳුන්වා දීමට සැලසුම් කර තිබේ.
ඒ සඳහා ගුරු පුහුණුව, යටිතල පහසුකම් සංවර්ධනය සහ ඩිජිටල්කරණ වැඩසටහන් දැනටමත් ක්‍රියාත්මක වන බවද ඇය සඳහන් කළාය. දේශපාලන මතවාද වෙනස් විය හැකි නමුත් දරුවන්ගේ අධ්‍යාපනය දේශපාලන ගැටුමක් බවට පත් නොකළ යුතු බවද අග්‍රාමාත්‍යවරිය අවධාරණය කර තිබේ.
අධ්‍යාපන ප්‍රතිසංස්කරණ පිළිබඳ මහජන දැනුවත් කිරීමේ අනුකමිටුවේ සම සභාපති මහාචාර්ය ප්‍රභාත් ජයසිංහ මහතා පැවසුවේ, ගුරුවරයා කේන්ද්‍ර කරගත් සහ කටපාඩම් කිරීම මත පදනම් වූ අධ්‍යාපන ක්‍රමයෙන් ඉවත්ව, සැබෑ ජීවිත අත්දැකීම් සමඟ සම්බන්ධ වූ ශිෂ්‍ය කේන්ද්‍රීය ඉගෙනුම් ක්‍රමයක් හඳුන්වාදීම මෙම ප්‍රතිසංස්කරණවල අරමුණක් බවයි.
අවසාන විභාග මත පමණක් රඳා නොසිට, සිසුන්ගේ විශ්ලේෂණාත්මක හැකියාව, නිර්මාණශීලීත්වය සහ ගැටලු විසඳීමේ හැකියාව ඇගයීම සඳහා අඛණ්ඩ ඇගයීම් ක්‍රම හඳුන්වාදීමටද සැලසුම් කර ඇත.
