අමරපුර සිරි සද්ධම්මවංස මහා නිකායේ බෙන්තර වළල්ලාවිට කෝරළයේ ප්‍රධාන අධිකරණ සංඝනායක, මහ ඉඳුරුව අකාඩේගොඩ ශ්‍රී අභිනවාරාමය ඇතුළු විහාරත්‍රයාධිපති, වෛද්‍යාචාර්ය අතිපූජ්‍ය කැප්පෙට්ටියාවේ සුධම්ම නායක ස්ථවිරයන් වහන්සේ අපවත් වීම ශාසනික හා ප්‍රජා සේවාවන් උදෙසා සිදු වූ පූරණය කළ නොහැකි පාඩුවක් ලෙස වාර්තා වේ. පසුගිය 23 වන දින පස්වරුවේ බලපිටිය මහ රෝහලේදී අපවත් වූ උන්වහන්සේගේ ශ්‍රී දේහය පිළිබඳ ආදාහන පූජෝත්සවය හෙට (26) මහ ඉඳුරුව සීලයන්ස් ක්‍රීඩා පිටියේදී රාජ්‍ය හා ආගමික ගෞරව සහිතව පැවැත්වීමට සියලු කටයුතු සූදානම් කර ඇත.
1950 වසරේදී වීරකැටිය, කැප්පෙට්ටියාව ග්‍රාමයේදී ජනිත වී 1968 වසරේදී පැවිදි දිවියට ඇතුළත් වූ උන්වහන්සේ, ආයුර්වේද වෛද්‍යවරයකු ලෙස වසර ගණනාවක් තිස්සේ නොමිලේ මහජනතාව සුවපත් කිරීමට කැපවෙමින් ප්‍රදේශයේ ජනතාවගේ ගෞරවාදරයට පාත්‍ර වූහ. ආගමික හා ශාසනික වගකීම්වලට අමතරව, දහම් පාසල් හා පිරිවෙන් අධ්‍යාපනයේ අභිවෘද්ධිය වෙනුවෙන් පෙනී සිටි උන්වහන්සේ, ඉඳුරුවේ සුජීව ස්ථවිරයන් වහන්සේ ඇතුළු ශිෂ්‍ය භික්ෂූන් වහන්සේලා 14 නමකට වැඩි පිරිසක් ශාසනයට දායාද කරමින් සම්බුද්ධ ශාසනයේ පදනම ශක්තිමත් කිරීමට අසමසම මෙහෙවරක් ඉටු කළහ.
අතිපූජ්‍ය කැප්පෙට්ටියාවේ සුධම්ම නාහිමිපාණන් වහන්සේගේ අපවත් වීම වෙනුවෙන් ආගමික ප්‍රජාව සහ ප්‍රදේශවාසීන් දැඩි ශෝකය පළ කර සිටින අතර, උන්වහන්සේ තබා ගිය ශාසනික සහ මානුෂීය උරුමය ඉදිරි පරම්පරාවන් විසින් ඉදිරියට ගෙන යනු ඇතැයි විශ්වාස කෙරේ. හෙට දින පැවැත්වෙන ආදාහන පූජෝත්සවය සඳහා මහා සංඝරත්නය, මැතිඇමැතිවරුන් ඇතුළු විශාල පිරිසක් සහභාගී වීමට නියමිත අතර, උන්වහන්සේගේ නික්ම යාම දේශීය ආයුර්වේද වෛද්‍ය ක්ෂේත්‍රයට මෙන්ම සමස්ත ශාසනික පද්ධතියටම දැඩි පාඩුවක් වනු ඇත.
