කාන්තාවන් පිළිබඳව විශේෂ අවධානයක් යොමුව ඇති මෙවැනි කාල වකවානුවක එලීනා ජයවර්ධන වැනි නිහතමානී කාන්තාවක් පිළිබඳ කෘතියක් එළිදැක්වීම ඉතා කාලෝචිත බව අග්‍රාමාත්‍ය මහින්ද රාජපක්ෂ මහතා පවසයි.
අග්‍රාමාත්‍යවරයා මේ බව පැවසුවේ කොළඹ බණ්ඩාරනායක ජාත්‍යන්තර සම්මන්ත්‍රණ ශාලාවේ ඊයේ (29) දින පැවති ප්‍රදීප් ජයවර්ධන මහතා විසින් රචිත “ප්‍රජාතන්ත්‍රවාදයේ ඒකාධිපතියා – ජේ. ආර්. ජයවර්ධන යුගයේ නොපළ කතා” කෘතිය සහ සාගරිකා දිසානායක මහත්මිය විසින් රචිත “එලීනා ජයවර්ධන – චරිතයක කථාවක්” යන කෘතීන් එළි දැක්වීමේ අවස්ථාවට එක්වෙමින්.
අග්‍රාමාත්‍ය මහින්ද රාජපක්ෂ මැතිතුමා මෙසේ පැවසිය ” “ඇත්ත වශයෙන්ම මම සන්තෝෂ වෙනවා මෙම කෘතීන් එළි දැක්වීමේ අවස්ථාවට එක්වීමට ලැබීම ගැන. මම පාසල් යන අවධියේ නැවතිලා හිටියේ ජේ.ආර්. ජයවර්ධන මහතා ගේ නිවසට ආසන්න නිවසක. එතන තවත් වෛද්‍ය ශිෂ්‍යයන් පිරිසකුත් හිටියා. මම එතුමිය දැක්කේ ඒ දවස් වල. ඇය ඉතාම නිහතමානී චරිතයක්. එලීනා මැතිනිය ගැන කෘතිය එළි දැක්වීම කාලෝචිත ක්‍රියාවක්. අද ගොඩක් දේශපාලනඥයින් පිරිහෙන්නේ ඔවුන්ගේ භාර්‍යාවන් නිසයි. මේ පොත කාන්තාවන් කියවන්න. එය කාන්තාවන්ට ඉතා වැදගත් වනු ඇතැයි ” අග්‍රාමාත්‍යතුමා පැවසීය.
බස්නාහිර පළාත සහිත කොළඹ සහ නව තොටමුණේ උප ප්‍රධාන සංඝනායක පූජ්‍ය ගැටහැත්තේ සෝභිත නායක හිමි, ජපානය ප්‍රමුඛ අග්නිදිග ආසියාවේ ප්‍රධාන සංඝනායක පැල්පොල විපස්සී නායක හිමි ඇතුළු ගරුතර මහා සංඝරත්නය හා හිටපු ජනාධිපති මෛත්‍රීපාල සිරිසේන, පරිසර අමාත්‍ය මහින්ද අමරවීර, පාර්ලිමේන්තු මන්ත්‍රී චරිත හේරත් හා හිටපු පාර්ලිමේන්තු මන්ත්‍රීවරුන් ඇතුළු සම්භාවනීය අමුත්තන් රැසක් මෙම අවස්ථාව සඳහා එක් වූහ.
