වතු කම්කරුවන්ගේ දෛනික වැටුප රුපියල් 1,700 දක්වා ඉහළ දැමිය යුතු බවට කම්කරු අමාත්‍යංශය විසින් මැයි 21 වන දා නිකුත් කළ ගැසට් නිවේදනය ක්‍රියාත්මක කිරීම වළක්වාලමින් ශ්‍රේෂ්ඨාධිකරණය ඊයේ (ජූලි 4) අතුරු තහනම් නියෝගයක් නිකුත් කළේ ය.
එම වැටුප් වැඩි කිරීමට එරෙහිව ආගරපතන වැවිලි සමාගම ඇතුළු වැවිලි සමාගම් කිහිපයක් විසින් ඉදිරිපත් කළ පෙත්සමක් විභාගයට ගැනීමට අවසර දෙමින් ගාමිණි අමරසේකර, කුමුදුනී වික්‍රමසිංහ සහ ජනක් ද සිල්වා යන ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල මෙම නියෝගය නිකුත් කළේ ය.
එහිදී විනිසුරු මඩුල්ල විසින් අදාළ පෙත්සම් විභාගය අවසන් වන තෙක් අදාළ අතුරු තහනම බල පැවැත්වෙන බව ද ප්‍රකාශ කරන ලදී.
වතු කම්කරුවන්ගේ වැටුප් වැඩි කරමින් කම්කරු අමාත්‍යවරයා විසින් ඉකුත් දා නිකුත් කළ ගැසට් නිවේදනය නීතියට පටහැනි බව ත් එය බල රහිත කිරීමේ නියෝගයක් නිකුත් කරන ලෙස ත් ඉල්ලා ආගරපතන වැවිලි සමාගම ඇතුළු වැවිලි සමාගම් 21ක් විසින් අභියාචනාධිකරණය හමුවේ රිට් පෙත්සමක් ගොනු කරන ලදී.
එම පෙත්සම් ඉකුත් ජූනි 3 වන දා සලකා බැලූ අතර එය විභාගයට ගැනීම සඳහා අවසර දුන් අභියාචනාධිකරණය වග උත්තරකරුවන්ට නොතීසි නිකුත් කළේ ය.
නමුත් කම්කරු අමාත්‍යවරයා විසින් නිකුත් කළ ගැසට් නිවේදනය ක්‍රියාත්මක කිරීම වළක්වාලමින් තහනම් නියෝගයක් නිකුත් කිරීම අභියාචනාධිකරණය විසින් ප්‍රතික්ෂේප කරන ලදී.
ඒ අනුව, අභියාචනාධිකරණය විසින් ලබා දෙන ලද එම තීරණය නීතියට පටහැනි බව ත් කම්කරු අමාත්‍යවරයා විසින් වතු කම්කරුවන්ගේ වැටුප් වැඩි කිරීමට අදාළව නිකුත් කළ ගැසට් නිවේදනය ක්‍රියාත්මක කිරීම වැළැක්වීමේ නියෝගයක් නිකුත් කරන ලෙස ත් ඉල්ලා වතු සමාගම් විසින් ශ්‍රේෂ්ඨාධිකරණය හමුවේ මෙම අභියාචනා පෙත්සම ඉදිරිපත් කර තිබිණි.
මෙම පෙත්සම නැවත පෙබරවාරි 18 වන දා කැඳවීමට නියමිත ය.
නීතිපතිවරයා වෙනුවෙන් අතිරේක සොලිසිටර් ජනරාල් විවේකා සිරිවර්ධන මහත්මිය පෙනී සිටි අතර වතු සමාගම් වෙනුවෙන් ජනාධිපති නීතිඥ ආචාර්ය රොමේෂ් ද සිල්වා හා ජනාධිපති නීතිඥ සංජීව ජයවර්ධන මහතා පෙනී සිටි අතර ලංකා වතු කම්කරු සංගමයේ ප්‍රධාන ලේකම් අමාත්‍ය ජීවන් තොණ්ඩමන් මහතා වෙනුවෙන් නිතීඥ ජීවන් තොණ්ඩමන් මහතා පෙනී සිට තිබේ.
