යාපනයට ඔබ්බෙන් වූ දූපත් තුනක දෙමුහුන් විදුලි ව්‍යාපෘති ක්‍රියාත්මක කිරීමට අදාළ පළමු ගෙවීම ඉන්දීය මහ කොමසාරිස් සන්තෝෂ් ජා විසින් විදුලිබල හා බලශක්ති ලේකම් සුලක්ෂණ ජයවර්ධන සහ ශ්‍රී ලංකා සුනිත්‍ය බලශක්ති අධිකාරියේ සභාපති රංජිත් සේපාල වෙත භාර දී තිබේ.
ඩෙල්ෆ්ට්, නයිනතිව් සහ අනලතිව් දූපත්වල දෙමුහුන් පුනර්ජනනීය බලශක්ති ව්‍යාපෘති ක්‍රියාත්මක කිරීම සඳහා වූ අවබෝධතා ගිවිසුමක් ඉන්දීය ජනරජයේ රජය සහ ශ්‍රී ලංකා රජය අතර 2022 මාර්තු මාසයේදී අත්සන් කරන ලදී.
ව්‍යාපෘති ක්‍රියාත්මක කිරීම සඳහා වන කොන්ත්‍රාත්තුව ශ්‍රී ලංකා සුනිත්‍ය බලශක්ති අධිකාරියේ විසින් U Solar Clean Energy Solutions පෞද්ගලික සමාගම සමඟ 2024 මාර්තු 01 දින අත්සන් කරන ලදී.
ජාතික විදුලිබල පද්ධතියට සම්බන්ධ නොවන එම දූපත් තුනේ ජනතාවගේ බලශක්ති අවශ්‍යතා සපුරාලීම අරමුණු කරගත් මෙම ව්‍යාපෘතිය මඟින් සූර්ය සහ සුළං යන දෙවර්ගයම ඇතුළුව විවිධ ආකාරයේ බලශක්ති ඒකාබද්ධ කරමින් ධාරිතාව සැපයීමට නියමිතය.
මෙම ස්ථාන තුනෙහි මූලික කටයුතු ආරම්භ කර ඇති අතර, ව්‍යාපෘතිය 2025 මාර්තු මස මුලදී අවසන් කර 2025 අප්‍රේල් අග වන විට භාරදීමට නියමිතව තිබේ.
මෙම ව්‍යාපෘතිය ඉන්දීය රජයේ අමෙරිකානු ඩොලර් මිලියන 11ක ප්‍රදානයක් යටතේ ක්‍රියාත්මක වන අතර බලශක්ති ක්ෂේත්‍රයේ ද්විපාර්ශ්වික සහයෝගීතාව සඳහා ඉන්දියාවේ කැපවීම මෙන්ම ශ්‍රී ලංකාව තුළ ඉන්දියාවේ සංවර්ධන හවුල්කාරිත්වය යළි තහවුරු කරයි.
ගෝඨාභය රාජපක්ෂ පාලන සමයේ දී මෙම ව්‍යාපෘතිය චීන රජය විසින් ශ්‍රී ලංකාව සඳහා යෝජනා කරන ලද්දකි.
එහෙත් ඉන්දියාව ඊට දැක්වූ විරෝධය හමුවේ ශ්‍රී ලංකාව එම ව්‍යාපෘතිය චීනයට ලබා නොදීමෙන් පසු චීනය එම ව්‍යාපෘතිය මාලදිවයිනට රැගෙන යන ලදී.
පසුව එම ව්‍යාපෘතිය සඳහා ඉන්දියාව ඉදිරිපත් විය.
