යුරෝපා නිරීක්ෂකයෝ ඡන්දෙ ගැන ඇහැ ගහගෙන!
ශ්රී ලංකාවේ ජනාධිපතිවරණයට අදාළ යුරෝපා සංගමයේ මැතිවරණ නිරීක්ෂණ මෙහෙයුම යටතේ සියලුම මැතිවරණ දිස්ත්‍රික්ක වෙත කෙටි කාලීන නිරීක්ෂකයන් 32 දෙනෙක් යොදවා තිබේ.
ඊයේ එම කටයුතු ඇරඹු ඔවුන් නිහඬ කාලය තුළ ක්‍රියාකාරකම් ද නිරීක්ෂණය කරනු ඇත.
ඡන්ද මධ්‍යස්ථාන විවෘත කිරීම, ඡන්දය ප්‍රකාශ කිරීම සහ ඡන්ද ගණන් කිරීම මෙන්ම ප්‍රතිඵල ලේඛනගත කිරීම ඇතුළු මැතිවරණ දින කටයුතු ඔවුන් විසින් නිරීක්ෂණය කිරීමට නියමිතය.
සෑම දිස්ත්‍රික්කයකම ගණන් කිරීමේ සහ වගුගත කිරීමේ මධ්‍යස්ථානයකම සිය නිරීක්ෂකයන් සිටීම මැතිවරණ ක්‍රියාවලියේ විනිවිදභාවය සඳහා ඔවුන්ගේ ඇති කැපවීම අවධාරණය කරන බව පෙන්වාදී තිබේ.
යුරෝපා සංගමයේ මැතිවරණ නිරීක්ෂණ මෙහෙයුම් කණ්ඩායම් කෙටි කාලීන නිරීක්ෂකයන් දෙදෙනෙකුගෙන් යුත් බහුජාතික කණ්ඩායම්වල වැඩ කරනු ඇති අතර ඔවුන් යෙදවීමට පෙර මැතිවරණ දින ක්‍රියාදාමයන් කෙරෙහි අවධානය යොමු කරමින් සවිස්තරාත්මක විස්තරයක් ලැබී ඇත.
මෙය අගෝස්තු 29 සිට දැනටමත් ශ්රී ලංකාවේ සියලුම පළාත්වල මැතිවරණ සඳහා සූදානම සහ ප්‍රචාරක පරිසරය නිරීක්ෂණය කරමින් සිටින දිගුකාලීන නිරීක්ෂකයන් 26 දෙනෙකුගේ කලින් යෙදවීමකින් පසුවයි.
“රටේ නීතියට මෙන්ම ශ්රී ලංකාව අත්සන් කර ඇති කලාපීය සහ අන්තර්ජාතික ප්‍රමිතීන්ට අදාළව මැතිවරණ ක්රියාවලිය පිළිබඳ දැනුවත්, කරුණු පදනම් කරගත් තක්සේරුවක් ඉදිරිපත් කිරීමට අපගේ කැපවීම විහිදෙනවා. එම කාර්යයේදී, යුරෝපා සංගමයේ මැතිවරණ නිරීක්ෂණ මෙහෙයුම මාර්ගෝපදේශක මූලධර්ම තුනකට දැඩි ලෙස අනුගත වනවා – ඒ, ස්වාධීනත්වය, අපක්ෂපාතීත්වය සහ මැදිහත් නොවීම,” යනුවෙන් යුරෝපා සංගමයේ මැතිවරණ නිරීක්ෂණ මෙහෙයුමේ ප්‍රධානියා සඳහන් කර තිබිණි.
පැමිණ සිටින කණ්ඩායම මෙහෙයවනු ලබන්නේ ස්පාඤ්ඤයේ යුරෝපීය පාර්ලිමේන්තු මන්ත්‍රී Nacho Sánchez Amor විසිනි.
මැතිවරණයෙන් දින දෙකකට පසු, සැප්තැම්බර් 23 වැනි දින කණ්ඩායම් ප්‍රධානියා කොළඹදී පවත්වන මාධ්‍ය හමුවකදී මෙහෙයුමේ මූලික සොයාගැනීම් සහ නිගමන පිළිබඳ ප්රකාශය ඉදිරිපත් කරනු ඇත.
ඉදිරි මැතිවරණ ක්‍රියාවලීන් සඳහා නිර්දේශ ඉදිරිපත් කරන විස්තීර්ණ අවසන් වාර්තාවක් සම්පූර්ණ මැතිවරණ ක්රියාවලිය අවසන් වූ පසු ප්‍රකාශයට පත් කෙරේ.
යුරෝපා සංගමයේ මැතිවරණ නිරීක්ෂණ මෙහෙයුම දැඩි මධ්‍යස්ථභාවය සහ මැදිහත් නොවීම අවශ්‍ය වන ආචාර ධර්ම පද්ධතියකින් බැඳී ඇත.
එය 2005 දී එක්සත් ජාතීන්ගේ අනුග්‍රහය යටතේ අනුමත කරන ලද අන්තර්ජාතික මැතිවරණ නිරීක්ෂණ සඳහා වූ මූලධර්ම ප්‍රකාශනයට අනුකූලව සිය කාර්යය භාර ගෙන ඇත.
[CWN]