නිල්වලා ගඟ ද්‍රෝණිය සඳහා නිකුත් කර තිබූ ගංවතුර අනතුරු ඇඟවීමේ නිවේදනය තවත් පැය 48ක කාලයක් සඳහා දීර්ඝ කර තිබේ.
ඒ අනුව මෙම අනතුරු ඇඟවීමේ නිවේදනය ඔක්තෝබර් 18 වනදා පස්වරු 6.00 දක්වා වලංගු වන බව වාරිමාර්ග දෙපාර්තමේන්තුව දැනුම් දී සිටී. නිල්වලා ගඟ ද්‍රෝණියේ ඉහළ සහ මධ්‍යම ප්‍රදේශවලට ඇදහැළුණු අධික වර්ෂාවත් සමඟ ජල මට්ටම් විශ්ලේෂණය කිරීමෙන් අනතුරුව මෙම තීරණය ගෙන ඇති අතර, අකුරැස්ස, අතුරලිය, මාලිම්බඩ, කඹුරුපිටිය, තිහගොඩ සහ මාතර යන ප්‍රාදේශීය ලේකම් කොට්ඨාසවල පහත්බිම් ප්‍රදේශවල සුළු ගංවතුර තත්ත්වයක් ඇතිවීමේ අවදානමක් පවතියි. එබැවින් අදාළ ප්‍රදේශවල ජනතාව සහ රියැදුරන් දැඩි අවධානයෙන් පසුවන ලෙස වාරිමාර්ග දෙපාර්තමේන්තුව ඉල්ලා සිටී.
