සමාජ මාධ්‍ය ජාලා 26ක් තහනම් කිරීමට රජය ගත් තීන්දුවට එරෙහිව නේපාලයේ කත්මණ්ඩු අගනුවර පාර්ලිමේන්තුව අබියස දී ආරම්භ කෙරුණු විරෝධතා මේ වන විට ප්‍රචණ්ඩ අරගලයක් බවට පත්ව තිබෙනවා.
එම ගැටුම්වලින් සිදුවූ මරණ ගණන 22 දක්වා ඉහළ ගොස් ඇති බවයි විදෙස් මාධ්‍ය වාර්තා කරන්නේ.
සමාජ මාධ්‍ය තහනම ඉවත් කිරීමට බලධාරීන් පියවර ගෙන තිබුණද විරෝධතාකරුවන් එය නොතකමින් තවදුරටත් විරෝධතාවයේ නිරත වනවා.
පවතින තත්වය හමුවේ අග්‍රාමාත්‍යවරයා, මෙන්ම ජනාධිපතිවරයා ද සිය ධුරවලින් ඉල්ලා අස්වීමට පියවර ගෙන තිබෙනවා.
ඇමතිවරු රැසක්ද සිය ධුරවලින් ඉල්ලා අස්වී ඇති බවයි එරට මාධ්‍ය පවසන්නේ.
විරෝධතාකරුවන් නේපාලයේ පාර්ලිමේන්තු ගොඩනැගිල්ලට මෙන්ම ශ්‍රේෂ්ඨාධිකරණ ගොඩනැල්ලටද ගිනි තබා ඇති බවයි වාර්තා වන්නේ.
ඇතැම් මැති ඇමතිවරු ඒ තුළ තවමත් සිරව සිටිනවා.
ඔවුන් බේරාගැනීමට කටයතු කරමින් සිටින බව නේපාල මාධ්‍ය පවසනවා.
ඇඳිරිනීතිය නොතකෙමින් සිදුකරන විරෝධතා අතරතුර අගමැති ඕලිගේ නිවස, ජනාධිපති රාම් චන්ද්‍ර පෝදල්ගේ නිවස, නේපාලයේ පාලක කොංග්‍රස පක්ෂයේ කාර්යාලය, මෙන්ම තවත් දේශපාලනඥයින් පිරිසකගේ නිවාස ගිනි තබා විනාශ කර ඇති බව ද වැඩිදුරටත් පවසනවා.
නේපාල හිටපු අගමැතිවරයෙකුගේ බිරිඳක් විරෝධතාකරුවන් ඝාතනය කර ඇති බව ද එරට මාධ්‍ය වාර්තා කරනවා.
මෙලෙස මියගොස් ඇත්තේ හිටපු අගමැති ජාලනාත් ඛනාල්ගේ බිරිඳ වන රාජ්‍යලක්ෂ්මි චිත්‍රකාර්.
ඇයව විරෝධතාකරුවන් කත්මණ්ඩු නුවර පිහිටි නිවසේ සිරකර නිවසට ගිනි තබා ඇති බව වාර්තා වනවා.
නේපාලයේ නීතිය හා සාමය ආරක්ෂා කිරීමේ වගකීම ඊයේ රාත්‍රී සිට එරට හමුදාව ඇතුළු ආරක්ෂක අංශ භාරයට ගෙන තිබෙනවා.
අර්බුදයෙන් ප්‍රයෝජන ගනිමින් ඇතැම් කණ්ඩායම් කොල්ලකෑම්, ගිනි තැබීම් සහ දේපොළ විනාශ කිරීම සිදුකරන බව නේපාල හමුදාව නිකුත්කරන ලද නිවේදනයක සඳහන්.
