ශ්‍රී ලංකාවේ ප්‍රථම දුඹුරු සීනි අලෙවි සැල් ජාලය ඊයේ (11) නුගේගොඩදී විධිමත් ලෙස ආරම්භ කරන ලදී.
මෙය කර්මාන්ත හා ව්‍යවසායකත්ව සංවර්ධන අමාත්‍ය සුනිල් හඳුන්නෙත්ති මහතාගේ සංකල්පයක් අනුව ක්‍රියාත්මක කරනු ලැබූ අතර, ලංකා සීනි සමාගම මඟින් එය යථා තත්ත්වයට පත්කර ඇත.
රජයට අයත් පැල්වත්ත හා සෙවණගල සීනි කර්මාන්ත ශාලාවලින් නිෂ්පාදනය කරන, උසස් තත්ත්වයේ දුඹුරු සීනි අඩු මිලට ලාංකික පාරිභෝගිකයන් වෙත ලබාදීම මෙහි ප්‍රධාන අරමුණ බව සඳහන් වේ.
අලෙවි ජාලය විවෘත කිරීමේ උත්සවයට වෙළඳ, වාණිජ, ආහාර සුරක්ෂිතතා සහ සමූපකාර සංවර්ධන කටයුතු පිළිබඳ නියෝජ්‍ය අමාත්‍ය ආර්.එම්. ජයවර්ධන මහතා, පාර්ලිමේන්තු මන්ත්‍රීවරුන්, ප්‍රාදේශීය දේශපාලන නියෝජිතයින්, කර්මාන්ත හා ව්‍යවසායකත්ව සංවර්ධන අමාත්‍යාංශයේ නිලධාරීන් සහ ලංකා සීනි සමාගමේ සභාපතිනි සඳමාලි චන්ද්‍රෙස්කර මහත්මිය ඇතුළු පිරිසක් සහභාගී වූහ.
