පසුගිය දින කිහිපය පුරාම දේශපාලන කරළියේ දැඩි කතාබහට ලක්වුණු මාතෘකාවක් වුණේ “අගමැති හරිනි අමරසූරිය මෙනවිය ඇගේ ධුරයෙන් ඉල්ලා අස්වීමට යනවා” කියන එකයි. මේ කතාව ඇත්තද බොරුද කියලා හැමෝම ඇඟිලි ගැන ගැන ඉන්නකොට, ඒ ගැන නිල ප්රකාශයක් කරන්න ජනතා විමුක්ති පෙරමුණේ ප්රධාන ලේකම් ටිල්වින් සිල්වා මහතා ඉදිරිපත් වෙලා තිබෙනවා.
“අගමැති පුටුවේ කිසිම වෙනසක් වෙන්නේ නැහැ!”
සතිඅන්ත පුවත්පතක් කළ විමසීමකට පිළිතුරු දෙමින් ටිල්වින් සිල්වා මහතා සහතික වෙලා තියෙන්නේ වත්මන් අගමැතිනියගේ හෝ ඇය දරන අධ්යාපන ඇමති ධුරයේ කිසිදු වෙනසක් කිරීමට ආණ්ඩුවට අවශ්යතාවයක් නැති බවයි. ඇය මේ වන තෙක් ඇගේ රාජකාරිවලදී කිසිදු වරදක් කර නැති බවත් ඔහු පවසනවා.
මේ දිනවල දැඩි කතාබහට ලක්වෙලා තියෙන අධ්යාපන ප්රතිසංස්කරණ ගැටලුව ගැනත් ලේකම්වරයා මෙහිදී අදහස් දක්වලා තිබුණා. ඔහු පවසන්නේ ඒ ගැන විධිමත් පරීක්ෂණයක් දැනටමත් ආරම්භ කර ඇති බවත්, වරද සිදුව ඇත්තේ කොතැනද කියා ඉක්මනින්ම හෙළි වන බවත්ය.
“ඕවා විපක්ෂයේ දවල් හීන…”
හරිනි අමරසූරිය මෙනවිය ඉවත් කරයි කියලා විපක්ෂය බලාපොරොත්තුවෙන් ඉන්නවා නම්, ඒක හුදෙක් “දවල් හීනයක්” පමණක් බවයි ටිල්වින් සිල්වා මහතා උපහාසයෙන් යුතුව සඳහන් කරන්නේ. ඇය විපක්ෂයට ලොකු අභියෝගයක් වෙලා තියෙන නිසයි, ඇයව ඉලක්ක කරගෙන මෙලෙස දිගින් දිගටම මඩ ප්රහාර සහ අසත්ය ප්රචාර එල්ල කරන්නේ කියලා ඔහු වැඩිදුරටත් කියා සිටිනවා.
