හිටපු ඉන්දීය හමුදාපති ජෙනරාල් එම්.එම්. නරවානෙ විසින් රචිත, එහෙත් ඉන්දීය ආරක්ෂක අමාත්යාංශය විසින් මෙතෙක් ප්රකාශයට පත් කිරීමට අවසර ලබා නොදුන් ‘Four Stars of Destiny’ නමැති ස්වයං චරිතාපදානයේ මුද්රිත පිටපතක් අද (04) රාහුල් ගාන්ධි විසින් පාර්ලිමේන්තු සංකීර්ණයේදී මාධ්ය වෙත ප්රදර්ශනය කර තිබේ. චීනය සමඟ පවතින දේශසීමා ආරවුල සම්බන්ධයෙන් මෝදි රජය අනුගමනය කළ ක්රියාපිළිවෙත විවේචනය කිරීම සඳහා ලෝක් සභාවේ විපක්ෂ නායකවරයා මෙම පොත උපුටා දැක්වීමට උත්සාහ කළද, එය නිල වශයෙන් ප්රකාශයට පත් කර නොමැති බව පවසමින් කථානායකවරයා සහ ආණ්ඩු පක්ෂය ඊට අවසර ලබා නොදුන්නේය.
ඉන්දීය ආරක්ෂක අමාත්ය රාජ්නාත් සිං අවධාරණය කර ඇත්තේ එවැනි පොතක් කිසිදා ප්රකාශයට පත් වී නොමැති බවයි. කෙසේ වෙතත්, අදාළ පොතේ කොටස් ඇතුළත් සඟරා ලිපියක් පදනම් කර ගනිමින් තමන් අදහස් දැක්වූ බවත්, රජය විසින් සඟවන සත්යය මෙම පොතේ අන්තර්ගත බවත් පවසන රාහුල් ගාන්ධි, අඛණ්ඩව තෙවන දිනටත් මෙම මතභේදාත්මක පොතේ පිටපතක් ප්රසිද්ධියේ පෙන්වමින් රජයට අභියෝග කළේය. හිටපු හමුදාපතිවරයෙකුගේ අත්දැකීම් ප්රකාශයට පත් කිරීමට රජය බිය වන්නේ ඇයිද යන්න පිළිබඳව ද මේ වන විට ඉන්දීය දේශපාලන කරළියේ දැඩි සංවාදයක් මතු වී තිබේ.
