පාකිස්තාන අභ්යන්තර කටයුතු අමාත්ය සයීඩ් මෝසින් රාසා නක්වි (Syed Mohsin Raza Naqvi) මහතා ඇතුළු දූත පිරිස සහ පාකිස්තාන ජාතික ක්රිකට් කණ්ඩායම මෙරටට පැමිණීම ශ්රී ලංකාව සහ පාකිස්තානය අතර පවතින දීර්ඝකාලීන මිත්රත්වය තවදුරටත් තහවුරු කරන්නක් බව ජනාධිපති අනුර කුමාර දිසානායක මහතා අවධාරණය කළේය. ජනාධිපතිවරයා මේ බව සඳහන් කළේ අද (16) පෙරවරුවේ ජනාධිපති ලේකම් කාර්යාලයේදී පාකිස්තාන අභ්යන්තර කටයුතු අමාත්යවරයා හමු වූ අවස්ථාවේදීය.
මෙහිදී අදහස් දැක්වූ පාකිස්තාන අමාත්යවරයා සුවිශේෂී අනාවරණයක් කරමින් කියා සිටියේ, 2026 විස්සයි-20 ලෝක කුසලාන තරගාවලිය සඳහා පාකිස්තාන ක්රිකට් කණ්ඩායම ශ්රී ලංකාවට එවීමට ගත් තීරණයට ජනාධිපති අනුර කුමාර දිසානායක මහතා පාකිස්තාන අග්රාමාත්යවරයා වෙත පුද්ගලිකවම ලබා දුන් දුරකථන ඇමතුම තීරණාත්මක සාධකයක් වූ බවයි. ජනාධිපතිවරයාගේ එම ඉල්ලීමට ගරු කරමින් පාකිස්තාන රජය මෙම සංචාරය තහවුරු කර ඇති අතර, මේ වසර තුළ නිල සංචාරයක් සඳහා පාකිස්තානයට පැමිණෙන ලෙස එරට අග්රාමාත්යවරයා කළ ආරාධනය ද අමාත්යවරයා මෙහිදී ජනාධිපතිවරයා වෙත පිරිනැමීය.
ශ්රී ලංකාව දුෂ්කරතාවන්ට පත් වූ සෑම අවස්ථාවකදීම, විශේෂයෙන්ම මෑතකදී ඇති වූ ‘ඩිට්වා’ (Ditwah) සුළි කුණාටු තත්ත්වයේදී පාකිස්තානය ලබා දුන් සහයෝගය ජනාධිපතිවරයා මෙහිදී කෘතවේදීව සිහිපත් කළේය. දෙරට අතර සංචාරක කර්මාන්තය, ආයෝජන සහ ශ්රම වෙළෙඳපොළ සම්බන්ධ යෝජනා පිළිබඳව ඉදිරියේදී පුළුල් ලෙස සාකච්ඡා කිරීමට ද දෙපාර්ශ්වයම එකඟත්වය පළ කළහ. මෙම අවස්ථාවට පාකිස්තාන දූත පිරිස මෙන්ම ශ්රී ලංකා රජය නියෝජනය කරමින් අමාත්ය ආචාර්ය අනිල් ජයන්ත ප්රනාන්දු, ජනාධිපති ලේකම් නන්දික සනත් කුමාරනායක යන මහත්වරුන් ඇතුළු පිරිසක් සහභාගී වූහ.
