ශ්රී ලංකා පොදුජන පෙරමුණේ ජාතික සංවිධායක නාමල් රාජපක්ෂ මහතාගේ ප්රධානත්වයෙන් අද (18) කොළඹ, නෙළුම් මාවත පක්ෂ මූලස්ථානයේදී තීරණාත්මක සාකච්ඡාවක් පැවැත්විණි. මෙම හමුව සඳහා මෑත කාලීනව විවිධ දේශපාලන ස්ථාවරයන්හි සිටි ප්රබල දේශපාලනඥයින් පිරිසක් එක්ව සිටීම විශේෂත්වයකි.
පක්ෂ මහ ලේකම් සාගර කාරියවසම් මහතාට අමතරව, හිටපු පාර්ලිමේන්තු මන්ත්රීවරුන් වන උදය ගම්මන්පිල, මහාචාර්ය ජී.එල්. පීරිස්, මහින්ද අමරවීර සහ අනුර ප්රියදර්ශන යාපා යන මහත්වරුන් මෙම අවස්ථාවට සහභාගී වී සිටියහ. එක් කාලයකදී විවිධ මත ගැටුම් හේතුවෙන් වෙන්ව සිටි මෙම කණ්ඩායම යළිත් නෙළුම් මාවතේදී නාමල් රාජපක්ෂ මහතා සමඟ මෙලෙස සාකච්ඡාවකට එක්වීම දේශපාලන කරළියේ දැඩි අවධානයට ලක්ව තිබේ.
මෙහිදී ඉදිරි දේශපාලන කටයුතු, නව සන්ධානයක් ගොඩනැගීම හෝ විපක්ෂයේ දේශපාලන ක්රියාකාරීත්වය ශක්තිමත් කිරීම පිළිබඳව අවධානය යොමු වී ඇති බව වාර්තා වේ. විශේෂයෙන්ම වත්මන් දේශපාලන වාතාවරණය තුළ පැරණි මිතුරන් යළිත් එක්වීමේ සූදානමක් පවතින්නේ දැයි දේශපාලන විචාරකයෝ ප්රශ්න කරති.
මෙම සාකච්ඡාවේදී ගනු ලැබූ නිශ්චිත තීරණ පිළිබඳව මෙතෙක් නිල ප්රකාශයක් නිකුත් කර නොමැති අතර, ඉදිරි දින කිහිපය තුළ මේ සම්බන්ධයෙන් තීරණාත්මක නිවේදන නිකුත් වනු ඇතැයි අපේක්ෂා කෙරේ.
