දිවයිනේ ප්රදේශ කිහිපයක ක්රියාත්මක වූ නීති විරෝධී මත්පැන් ජාවාරම් මැඩපැවැත්වීම සඳහා පොලිසිය සහ විශේෂ කාර්ය බලකාය (STF) සිදු කළ විශේෂ මෙහෙයුම් මාලාවකදී සැකකරුවන් සිව්දෙනෙකු සහ විශාල මත්පැන් තොගයක් අත්අඩංගුවට ගැනීමට සමත් වී තිබේ.
කැස්බෑව, බටුවන්දර ප්රදේශයේ පවත්වාගෙන ගිය මහා පරිමාණ මත්පැන් පෙරීමේ මධ්යස්ථානයක් වැටලීමට කැස්බෑව පොලිසිය සමත් වූ අතර එහිදී රුපියල් ලක්ෂ දහයක් පමණ වටිනා මත්පැන්, ගෝඩා බැරල් 10ක් සහ පෙරීමේ උපකරණ සොයාගෙන ඇත. මෙහි නිපදවන මත්පැන් බණ්ඩාරගම, වාද්දුව සහ මොරටුව යන ප්රදේශවලට බෙදාහැර ඇති බව ප්රශ්න කිරීම්වලදී අනාවරණය වී තිබේ. අත්අඩංගුවට ගත් 41 හැවිරිදි සැකකරු කැස්බෑව ප්රදේශයේ පදිංචිකරුවෙකි.
මිනුවන්ගොඩ ප්රදේශයේදී දිනක් තුළ වැටලීම් දෙකක් සිදු කරමින් සැකකරුවන් දෙදෙනෙකු අත්අඩංගුවට ගෙන ඇත. මිනුවන්ගොඩ වෑගොව්ව ප්රදේශයේදී ගෝඩා ලීටර් 515ක් සහ මත්පැන් බෝතල් 170ක් සමඟ එක් සැකකරුවෙකු ද, වැල්හේන ප්රදේශයේදී ගෝඩා ලීටර් 1260ක් සමඟ තවත් සැකකරුවෙකු ද කොටු කර ගැනීමට ආරක්ෂක අංශ සමත් විය. මීට අමතරව, හලාවත කණකැටිය ප්රදේශයේදී ත්රිරෝද රථයකින් මත්පැන් බෝතල් 100ක් ප්රවාහනය කරමින් සිටි 31 හැවිරිදි සැකකරුවෙකු ද අත්අඩංගුවට ගෙන තිබේ.
අත්අඩංගුවට ගත් සියලුම සැකකරුවන් සහ නඩු භාණ්ඩ අදාළ මහේස්ත්රාත් අධිකරණ වෙත ඉදිරිපත් කිරීමට නියමිත අතර පොලිසිය මේ පිළිබඳ වැඩිදුර විමර්ශන පවත්වයි.
