මැලේසියාවේ සිට ගුවන් භාණ්ඩ (Air Cargo) ලෙස මෙරටට එවා තිබූ රුපියල් මිලියන 536කට (කෝටි 53කට) අධික වටිනාකමකින් යුත් මත්ද්රව්ය තොගයක් අත්අඩංගුවට ගැනීමට ශ්රී ලංකා රේගුව සමත්ව තිබේ. පෑලියගොඩ ප්රදේශයේ පිහිටි රේගු ගබඩාවකදී ඊයේ (04) සිදුකළ විශේෂ පරීක්ෂාවකදී විවිධ ආහාර ද්රව්ය අඩංගු පාර්සල් තුළ සූක්ෂ්ම ලෙස සඟවා තිබූ මෙම මත්ද්රව්ය තොගය සොයාගත් බව රේගු මාධ්ය ප්රකාශක කාර්යාලය සඳහන් කරයි.
මෙහිදී රුපියල් මිලියන 510.7ක් වටිනා හෂීස් (Hashish) මත්ද්රව්ය කිලෝ ග්රෑම් 51.07ක් සහ රුපියල් මිලියන 25.4ක් වටිනා අයිස් (Crystal Methamphetamine) මත්ද්රව්ය කිලෝ ග්රෑම් 1.07ක් සොයාගෙන ඇත. අදාළ භාණ්ඩ තොගය කොළඹ 10, 14 සහ 15 යන ප්රදේශවල පදිංචි පුද්ගලයන් සිව්දෙනෙකුගේ ලිපිනයන් වෙත එවා තිබූ බව මූලික විමර්ශනවලදී හෙළි වී තිබේ.
රේගු නිලධාරීන් විසින් සිදුකළ මූලික විමර්ශනවලින් අනතුරුව, අත්අඩංගුවට ගත් මත්ද්රව්ය තොගය සහ සැකකරුවන් ඉදිරි විමර්ශන කටයුතු සඳහා පොලිස් මත්ද්රව්ය නාශක කාර්යාංශය (PNB) වෙත භාර දී ඇත. මැදපෙරදිග කලාපයේ පවතින යුදමය නොසන්සුන්තාවය හමුවේ ජාත්යන්තර සැපයුම් ජාලයන්හි වෙනස්කම් සිදුවෙමින් පවතින පසුබිමක, මෙරටට මත්ද්රව්ය ගලා ඒම වැළැක්වීම සඳහා රේගුව සිය පරීක්ෂා කිරීම් දැඩි කර තිබේ. සැකකරුවන්ට එරෙහිව ඉදිරියේදී අධිකරණ ක්රියාමාර්ග ගැනීමට නියමිතය.
