ශ්රී ලංකා ජල ක්රීඩා සංගමය සහ ගල්කිස්ස මහ හෝටලයේ පූර්ණ අනුග්රහයෙන් සංවිධානය කරන ලද 87 වන සැතපුම් දෙකේ මුහුදු පිහිණුම් තරගාවලිය (Two Miles Sea Swimming) උත්කර්ෂවත් අයුරින් ගල්කිස්ස මුහුදු තීරයේදී නිමාවට පත් විය. දශක නවයකට ආසන්න ඉතිහාසයක් ඇති මෙම සුවිශේෂී තරගාවලිය සඳහා මෙවර ක්රීඩක ක්රීඩිකාවන් 1000ක් පමණ සහභාගී වූ අතර, විදේශීය ක්රීඩක ක්රීඩිකාවන් රැසක්ද ඊට එක්ව සිටීම විශේෂත්වයකි.
තරගාවලියේ තීරණාත්මක විවෘත පිරිමි අංශයේ ප්රථම ස්ථානය දිනා ගැනීමට ජෙෆාරි දූලපන්දන් පිහිනුම් පාසලේ තරුෂ පෙරේරා සමත් වූ අතර, විවෘත කාන්තා අංශයේ ප්රථම ස්ථානය අම්බලන්ගොඩ පිහිනුම් ඇකඩමියේ අනුහංසි ද සිල්වා විසින් දිනා ගන්නා ලදී. වයස අවුරුදු 15න් පහළ බාලක ශූරතාව මරදාන සාන්ත ජෝසප් විද්යාලයේ ඒරන් ද සේරම් දිනාගත් අතර, 15න් පහළ බාලිකා ශූරතාව පානදුර ලීඩ්ස් ජල ක්රීඩා සමාජයේ මින්දේ තෙහස්යා පියසේන සතු විය.
කණ්ඩායම් දක්ෂතා සැලකිල්ලට ගැනීමේදී, පිරිමි කණ්ඩායම් ශූරතාව මරදාන සාන්ත ජෝසප් විද්යාලය දිනාගත් අතර, කාන්තා කණ්ඩායම් ශූරතාව සහ අන්තර් සේවා කුසලානය ශ්රී ලංකා යුද හමුදා කණ්ඩායම විසින් දිනා ගන්නා ලදී. 15න් පහළ බාලක අංශයේ දයානන්ද සහෝදරයෝ අභියෝගතා කුසලානය සාන්ත ජෝසප් විද්යාලයටත්, බාලිකා අංශයේ ශූරතාව සීෆිට් ජල ක්රීඩා සමාජයටත් හිමි විය. තරගාවලියේ වයස්ගතම ක්රීඩකයා ලෙස ඒ.සී. ස්මිත් සහ වයස්ගතම ක්රීඩිකාව ලෙස අයේෂා ප්රනාන්දු සම්මානයට පාත්ර වූහ.
ගල්කිස්ස මහ හෝටලයේ ප්රධාන මෙහෙයුම් නිලධාරී අනුර දේවපුර මහතා සහ ශ්රී ලංකා ජල ක්රීඩා සංගමයේ සභාපති මේජර් ජෙනරාල් මානද යහම්පත් මහතා ඇතුළු සම්භාවනීය අමුත්තන් රැසකගේ සහභාගීත්වයෙන් ත්යාග ප්රදානෝත්සවය පැවැත්විණි. ශ්රී ලංකාවේ පැරණිතම සහ ජනප්රියම ජල ක්රීඩා ඉසව්වක් වන මෙම තරගාවලිය මෙවරත් ඉතා සාර්ථකව නිමාවට පත් වූයේ නවක ක්රීඩක ක්රීඩිකාවන් රැසකට ජාත්යන්තර මට්ටමේ අත්දැකීමක් ලබා දෙමිනි.
