ඉරානයේ ටෙහෙරාන් අගනුවර පිහිටි තෙල් ගබඩා සංකීර්ණ ඉලක්ක කර ගනිමින් ඊශ්රායලය එල්ල කළ ප්රහාර හේතුවෙන් මතුව ඇති කළු දුමාරය සමඟ විෂ සහිත අම්ල වැසි ඇතිවීමේ අවදානමක් පවතින බව ඉරාන රතු පඩියන් සංගමය අනතුරු අඟවයි. මිලියන 10ක පමණ ජනගහනයක් වෙසෙන ටෙහෙරාන් නගරයේ අහස මේ වන විට දැඩි කළු දුමාරයකින් වැසී පවතින අතර, යුද ගැටුම් ආරම්භයේ සිට සිවිල් කාර්මික මධ්යස්ථානයක් ඉලක්ක වූ පළමු අවස්ථාව මෙය ලෙස වාර්තා වේ.
පවතින තත්ත්වය හමුවේ මහජනතාවට හැකිතාක් නිවෙස් තුළට වී රැඳී සිටින ලෙසත්, වර්ෂාව පවතින අවස්ථාවලදී එළිමහනට නොයන ලෙසත් රතු පඩියන් සංගමය සමාජ මාධ්ය ඔස්සේ නිවේදනය කර ඇත. තෙල් පහසුකම් ගිනි ගැනීමෙන් පිටවන විෂ සහිත අංශු ආශ්වාස වුවහොත් ලුණු වතුරෙන් උගුර සේදීම වැනි ප්රථමාධාර අනුගමනය කරන ලෙසද ඔවුන් උපදෙස් දී තිබේ. මීට අමතරව, යුද ගැටුම් හේතුවෙන් මේ වන විට එරට සිවිල් ගොඩනැගිලි 10,000කට අධික සංඛ්යාවක් විනාශ වී ඇති බවද එම සංගමය පෙන්වා දෙයි.
පරිසරවේදීන් පෙන්වා දෙන්නේ මෙම විෂ සහිත දුමාරය වර්ෂාව සමඟ මිශ්ර වීමෙන් ඇතිවන අම්ල වැසි ටෙහෙරාන් නගරය අවට පිහිටි ජලාශවලට එකතු විය හැකි බවයි. මෙය මිලියන සංඛ්යාත ඉරාන වැසියන්ගේ පානීය ජලයේ ගුණාත්මක භාවයට සෘජුවම බලපෑම් එල්ල කළ හැකි බරපතල පාරිසරික අර්බුදයක් බවට පත්වීමේ අවදානමක් පවතී. පවතින යුදමය වාතාවරණය හමුවේ සිදුවන මෙම පාරිසරික විනාශය පිළිබඳව ජාත්යන්තර අවධානය ද යොමුව තිබේ.
