දක්ෂිණ අධිවේගී මාර්ගයේ බද්දේගම සහ කුරුඳුගහහැතැප්ම අතර 76.4 වන කිලෝමීටර් කණුව අසලදී ඊයේ (07) උදෑසන සිදුවූ රිය අනතුරකින් පුද්ගලයින් තිදෙනෙකු තුවාල ලබා රෝහල් ගත කර තිබේ. ගෑස් සිලින්ඩර තොගයක් පටවාගෙන කොළඹ දෙසට ධාවනය වෙමින් තිබූ ප්රයිම් මුවර් (Prime Mover) රථයක් මාර්ගයෙන් ඉවතට පැන අසල වූ පහළ බෑවුමට පෙරළීමෙන් මෙම අනතුර සිදුව ඇත.
අධික වේගයෙන් ධාවනය වෙමින් තිබූ මෙම බර වාහනය රියදුරාට පාලනය කර ගැනීමට නොහැකි වීම නිසා ආරක්ෂිත වැටවල් ද බිඳගෙන බෑවුමට පෙරළී ගොස් ඇති බව වාර්තා වේ. අනතුර සිදුවන අවස්ථාවේදී රථයේ ගමන් කළ තිදෙනෙකු බරපතල තුවාල ලබා ඇති අතර, අධිවේගී මාර්ගයේ හදිසි මෙහෙයුම් ඒකකයේ සහය ඇතිව ඔවුන් වහාම කරාපිටිය ශික්ෂණ රෝහල වෙත ඇතුළත් කිරීමට පියවර ගෙන තිබුණි.
ප්රවාහනය කරමින් තිබූ ගෑස් සිලින්ඩර විසිරී යාම නිසා එම ප්රදේශයේ ගමනාගමන කටයුතුවලට ද යම් බාධාවක් එල්ල වූ අතර, ගෑස් කාන්දුවක් සිදුවීමේ අවදානමක් පවතීදැයි පරික්ෂා කිරීම සඳහා විශේෂ කණ්ඩායම් කැඳවා තිබුණි. අධිවේගී මාර්ග පොලිස් කොට්ඨාසය විසින් අනතුර සම්බන්ධයෙන් වැඩිදුර විමර්ශන පවත්වන අතර, රියදුරාට නින්ද යාම හෝ වාහනයේ කාර්මික දෝෂයක් මෙම අනතුරට හේතු වූවාද යන්න පිළිබඳව ද අවධානය යොමු කර ඇත.
