බටහිර බෙංගාලයේ පාලක පක්ෂය වන තෘණමූල කොංග්රසය (TMC) සහ ඉන්දීය මැතිවරණ කොමිෂන් සභාවේ (ECI) ඉහළ නිලධාරීන් අතර අද (09) කොල්කටා නුවරදී පැවැති සාකච්ඡාවකදී දැඩි උණුසුම්කාරී තත්ත්වයක් හටගෙන තිබේ.
පක්ෂය නියෝජනය කළ අමාත්ය චන්ද්රීමා භටාචාර්ය පවසන්නේ ප්රධාන මැතිවරණ කොමසාරිස් ජ්ඤානේෂ් කුමාර් තමන්ට ඇඟිල්ල දිගු කරමින් කෑගැසූ බවයි. තමා කාන්තාවක් වුවද එලෙස හැසිරීමෙන් ඔහු කාන්තාවන්ට ගරු නොකරන බව ඔප්පු වන බව ඇය වැඩිදුරටත් සඳහන් කළාය. බටහිර බෙංගාලයේ ඡන්දදායකයන් ලැයිස්තු සංශෝධනය කිරීමේදී (SIR) සිදුවී ඇතැයි කියන අක්රමිකතා සහ ලක්ෂ 60කට අධික පිරිසකගේ නම් ඉවත් කිරීම සම්බන්ධයෙන් සාකච්ඡා කිරීමට මෙම හමුව පවත්වා තිබුණි. මෙම සිද්ධිය සම්බන්ධයෙන් TMC පක්ෂය ශ්රේෂ්ඨාධිකරණයට ගොස් ඇති බැවින් ඒ ගැන කතා කිරීමට තමන්ට නොහැකි බව ප්රධාන මැතිවරණ කොමසාරිස්වරයා පවසා ඇත.
කෙසේ වෙතත්, කොමිෂන් සභා ආරංචි මාර්ග පවසන්නේ අමාත්යවරිය මුලින් කෑගැසීමට පටන් ගත් බවත්, ඇයට හඬ පාලනය කරගන්නා ලෙසත් කරුණු ලිඛිතව ඉදිරිපත් කරන ලෙසත් ඔහු උපදෙස් දුන් බවත්ය. මෙම සාකච්ඡාවට පෙර ජ්ඤානේෂ් කුමාර් මහතා කොල්කටා ගුවන් තොටුපළට පැමිණි අවස්ථාවේදී ද TMC ආධාරකරුවන් “Gyanesh Kumar Go Back” යනුවෙන් සඳහන් පුවරු ප්රදර්ශනය කරමින් කළු කොඩි ඔසවා විරෝධය පළ කර තිබුණි. බටහිර බෙංගාලයේ මීළඟ ප්රාන්ත මැතිවරණයට පෙර මෙම සිද්ධිය දේශපාලනික වශයෙන් විශාල කැළඹීමක් ඇති කර තිබේ.
