රුසියානු ජනාධිපති ව්ලැඩිමීර් පුටින් වත්මන් ගැටුම් මැද ඉරානයට යම් මට්ටමක සහයෝගයක් ලබා දෙන බව තමා විශ්වාස කරන බව ඇමෙරිකානු ජනාධිපති ඩොනල්ඩ් ට්රම්ප් පවසයි. ෆොක්ස් නිව්ස් රේඩියෝව (Fox News Radio) සමඟ පැවැති සම්මුඛ සාකච්ඡාවකට එක්වෙමින් ට්රම්ප් සඳහන් කළේ, අමෙරිකාව ප්රමුඛ බටහිර රටවල් යුක්රේනයට ලබා දෙන සහයෝගයට ප්රතිචාරයක් ලෙස රුසියාව මෙම පියවර ගන්නට ඇති බවයි. “මම හිතන්නේ ඔහු ඉරානයට ටිකක් උදව් කරනවා ඇති. අපි යුක්රේනයට උදව් කරන නිසා ඔහු එහෙම කරනවා කියලා ඔහු හිතනවා ඇති” යනුවෙන් ට්රම්ප් එහිදී වැඩිදුරටත් අදහස් දැක්වීය.
මැදපෙරදිග කලාපයේ පවතින උණුසුම් යුද වාතාවරණය සහ අමෙරිකාව ඉරානයට එරෙහිව ගෙන ඇති දැඩි ස්ථාවරය හමුවේ, රුසියාව සහ ඉරානය අතර ගොඩනැගෙමින් පවතින මෙම යුදමය සහ දේශපාලනික සබඳතාවය ජාත්යන්තර අවධානයට ලක්ව තිබේ. විශේෂයෙන්ම අමෙරිකාව යුක්රේනයට ලබා දෙන යුද ආධාර රුසියාවේ දැඩි දෝෂදර්ශනයට ලක්ව ඇති පසුබිමක, රුසියාව ඉරානයට ලබා දෙන මෙම සහයෝගය ගෝලීය බලතුලනයට සෘජුව බලපානු ඇති බව දේශපාලන විචාරකයෝ පෙන්වා දෙති. ට්රම්ප්ගේ මෙම ප්රකාශයත් සමඟ ඉදිරි දිනවලදී අමෙරිකානු විදේශ ප්රතිපත්තියේ යම් වෙනස්කම් සිදුවිය හැකි බවට ද අනුමාන කෙරේ.
