රැකියා නියුක්ත කාන්තාවන් සහ ශිෂ්යාවන් සඳහා ජාතික මට්ටමින් ඔසප් නිවාඩු ප්රතිපත්තියක් හඳුන්වා දෙන ලෙස ඉල්ලා ගොනු කළ පෙත්සමක් විභාග කළ ඉන්දීය ශ්රේෂ්ඨාධිකරණය එම ඉල්ලීම ප්රතික්ෂේප කරමින් දැඩි ප්රකාශයක් සිදු කර තිබේ. අගවිනිසුරු සූරිය කාන්ත් මහතා ප්රමුඛ ද්විපුද්ගල විනිසුරු මඬුල්ල මෙහිදී පෙන්වා දුන්නේ මෙවැනි නිවාඩුවක් නීතියෙන් අනිවාර්ය කළහොත් පෞද්ගලික අංශයේ ආයතන කාන්තාවන්ට රැකියා ලබා දීමට මැලි වනු ඇති බවයි. මෙය කාන්තාවන් තම පිරිමි සගයන්ට වඩා පසුපසින් සිටින බවට හැඟීමක් ඇති කරන අතර එය ඔවුන්ගේ වෘත්තීය වර්ධනයට මෙන්ම සේවා නියුක්ත වීමේ හැකියාවට (Employability) බරපතළ හානියක් වනු ඇති බව අධිකරණයේ මතය විය.
මෙම පෙත්සම ශෛලේන්ද්ර මනි ත්රිපාති නම් නීතිඥවරයා විසින් ගොනු කර තිබූ අතර, ඔහු අපේක්ෂා කළේ ඔසප් වීමේදී ඇතිවන කායික අපහසුතා සැලකිල්ලට ගෙන මසකට දින දෙක තුනක නිවාඩුවක් කාන්තාවන්ට ලබා දීමට රජයට නියෝග කරවා ගැනීමටයි. කෙසේ වෙතත්, විනිසුරුවරුන් ප්රකාශ කළේ මෙවැනි ප්රතිපත්තියක් මගින් “කාන්තාවන් දුර්වලයි” යන ලිංගිකමය මතිමතාන්තර තවදුරටත් තහවුරු විය හැකි බවයි. එබැවින් රජය විසින් අදාළ පාර්ශ්වයන් සමඟ සාකච්ඡා කර මෙවැනි ප්රතිපත්තියක් සකස් කරන්නේ නම් එය වඩාත් උචිත බව අධිකරණය වැඩිදුරටත් පෙන්වා දුන්නේය.
මෙම තීන්දුව සම්බන්ධයෙන් ඉන්දියාවේ මානව හිමිකම් සහ සෞඛ්ය ක්ෂේත්රයේ විද්වතුන් විවිධ අදහස් පළ කරති. ස්පාඤ්ඤය, ජපානය සහ දකුණු කොරියාව වැනි රටවල් දැනටමත් ඔසප් නිවාඩු ක්රියාත්මක කරන බව පෙන්වා දෙන ඔවුන්, මෙය කාන්තා අයිතිවාසිකමක් මිස වරප්රසාදයක් නොවන බව පවසති. දැනටමත් ඉන්දියාවේ කර්ණාටක, ඔඩිෂා සහ බිහාරය වැනි ප්රාන්ත මෙන්ම Zomato වැනි ප්රමුඛ පෙළේ පෞද්ගලික සමාගම් කිහිපයක් සිය කැමැත්තෙන්ම මෙම නිවාඩුව හඳුන්වා දී ඇතත්, ශ්රේෂ්ඨාධිකරණයේ මෙම නව ස්ථාවරය කාන්තාවන් වෘත්තීය ක්ෂේත්රය තුළ කොන් කිරීමට හේතුවනු ඇතැයි ඇතැම් ක්රියාකාරීහු බිය පළ කරති.
