ඉරානයේ ප්රධානතම තෙල් අපනයන මධ්යස්ථානය වන කර්ජ් දූපතේ (Kharg Island) පිහිටි හමුදා ඉලක්ක වෙත ඇමෙරිකානු හමුදා එල්ල කළ ප්රහාරත් සමඟ මැදපෙරදිග යුද ගින්න තවදුරටත් දරුණු වී තිබේ. ඉරාන ඒකාබද්ධ හමුදා අණදෙන මූලස්ථානය සෙනසුරාදා (14) නිවේදනය කළේ, තම රටේ තෙල් යටිතල පහසුකම්වලට හානි වුවහොත් ඇමෙරිකාව සමඟ සහයෝගයෙන් කටයුතු කරන කලාපීය රටවල පිහිටි සියලුම ඇමෙරිකානු තෙල් සමාගම් වෙත දැඩි ප්රතිප්රහාර එල්ල කරන බවයි.
අමෙරිකානු ජනාධිපති ඩොනල්ඩ් ට්රම්ප් සිකුරාදා සිය ‘Truth Social’ ගිණුමේ සටහනක් තබමින් ප්රකාශ කළේ, කර්ජ් දූපතේ හමුදා ඉලක්ක සාර්ථකව විනාශ කළත්, තෙල් පිරිපහදු මධ්යස්ථානවලට ප්රහාර එල්ල කිරීමෙන් දැනුවත්ව වැළකී සිටි බවයි. කෙසේ වෙතත්, හෝමුස් සමුද්ර සන්ධියේ නිදහස් නාවික ගමනාගමනයට ඉරානය බාධා කළහොත් එම තීරණය වහාම වෙනස් කර තෙල් කර්මාන්තයට ද ප්රහාර එල්ල කරන බවට ඔහු අනතුරු ඇඟවීය. ඉරානයේ බොරතෙල් අපනයනයෙන් 90% ක්ම සිදු කෙරෙන කර්ජ් දූපතට ප්රහාර එල්ල වුවහොත් ලෝක බලශක්ති සැපයුමට එය දැඩි බලපෑමක් වනු ඇත.
සති දෙකකට ආසන්න කාලයක් පවතින මෙම ගැටුම් හේතුවෙන් මේ වන විට මියගිය සංඛ්යාව 2,200 ඉක්මවා ඇති අතර ඉන් වැඩි පිරිසක් ඉරාන වැසියන්ය. ඊශ්රායලය විසින් ඉරානයේ ඉලක්ක 200 කට අධික ප්රමාණයකට ප්රහාර එල්ල කර ඇති අතර, ඊට ප්රතිචාර ලෙස ඉරානය එල්ල කරන ඩ්රෝන ප්රහාර කුවේටය, ඉරාකය සහ එක්සත් අරාබි එමීර් රාජ්යය වැනි රටවල ගුවන් සීමාවන්ට ද ඇතුළු වී තිබේ. මිලියන සංඛ්යාත පිරිසක් අවතැන්ව සිටින මෙම අර්බුදය හමුවේ ලෝක තෙල් මිල ද සීඝ්රයෙන් ඉහළ යමින් පවතී.
