මැදපෙරදිග කලාපයේ පවතින උග්ර යුදමය වාතාවරණය හමුවේ වුවද, ශ්රී ලංකාවේ ඉන්ධන සැපයුම අඛණ්ඩව පවත්වාගෙන යාමට සහ රටේ බලශක්ති සුරක්ෂිතතාව තහවුරු කිරීමට ලංකා IOC (LIOC) සමාගම උපරිමයෙන් කැපවී සිටින බව එහි කළමනාකාර අධ්යක්ෂ කේ. රගු (K. Raghu) මහතා අද (14) ප්රකාශ කළේය. පවතින ගෝලීය තත්ත්වය එතරම් යහපත් නොවන බව පිළිගන්නා අතරම, ජනතාව අනවශ්ය බියක් ඇති කරගත යුතු නැති බවත් රටේ ප්රගමනයට අවශ්ය ඉන්ධන ලබා දීමට රජය සහ අනෙකුත් සමාගම් සමඟ එක්ව කටයුතු කරන බවත් ඔහු අවධාරණය කළේය.
“ලංකා IOC කළමනාකාර අධ්යක්ෂවරයා ලෙස මට ජනතාවට කියන්න තියෙන්නේ ඔබ සැවොම සුරක්ෂිත දෑත් මත සිටින බවයි. අපි ඉන්ධන සැපයුම් දාමය අඛණ්ඩව පවත්වාගෙන යනවා මෙන්ම රටට ඉතා වැදගත් වන බලශක්ති සුරක්ෂිතතාව සපයනවා,” යැයි රගු මහතා වැඩිදුරටත් සඳහන් කළේය. හෝමුස් සමුද්ර සන්ධියේ පවතින යුදමය අවදානම සහ ගෝලීය තෙල් මිල ඉහළ යාම හමුවේ වුවද, සිය සමාගම උපරිම උත්සාහයක නිරත වන බව ඔහු මෙහිදී සහතික විය.
