සති දෙකක පමණ නිහඬතාවයකින් පසුව, චීන යුද ගුවන් යානා විශාල වශයෙන් තායිවාන සමුද්ර සන්ධියේ මෙහෙයුම් ආරම්භ කර ඇති බව තායිවාන ආරක්ෂක අමාත්යාංශය නිවේදනය කරයි. පසුගිය සෙනසුරාදා දිනයේ පමණක් චීන යුද ගුවන් යානා 26ක් තායිවානය අවට සැරිසරා ඇති අතර, ඉන් යානා 16ක්ම තායිවාන ගුවන් ආරක්ෂක හඳුනාගැනීමේ කලාපයට (ADIZ) ඇතුළු වී තිබේ. මීට අමතරව චීන යුද නැව් 7ක් ද එම මුහුදු සීමාවේ රැඳී සිටින බව වාර්තා වේ.
පසුගිය පෙබරවාරි අග සිට මාර්තු මුල දක්වා චීන මෙහෙයුම්වල කැපී පෙනෙන අඩුවීමක් දක්නට ලැබුණු අතර, විශ්ලේෂකයන් පෙන්වා දෙන්නේ එය එළැඹෙන මාර්තු 31 වනදාට යෙදී ඇති අමෙරිකානු ජනාධිපති ඩොනල්ඩ් ට්රම්ප්ගේ චීන සංචාරය වෙනුවෙන් ගත් තාවකාලික පසුබැසීමක් විය හැකි බවයි. කෙසේ වෙතත්, චීන නාවික හමුදාව අඛණ්ඩව එම ප්රදේශයේ රැඳී සිටි බවත්, තායිවානය සිය ආරක්ෂක විධිවිධාන කිසිසේත් ලිහිල් කර නොමැති බවත් තායිවාන ආරක්ෂක අමාත්ය වෙලිංටන් කූ මහතා අවධාරණය කළේය.
1949 සිට ස්වාධීන පාලනයක් පැවතියද, තායිවානය චීනයේ කොටසක් ලෙස සලකන බීජිං පාලනය, අවශ්ය වුවහොත් බලය යොදා හෝ එය අත්පත් කරගන්නා බවට දිගින් දිගටම අනතුරු අඟවමින් සිටී. මෙම නවතම ගුවන් මෙහෙයුම් ඉහළ යාම කලාපීය ආරක්ෂාව පිළිබඳ යළිත් ලෝක අවධානය යොමු කරවීමට සමත් වී ඇත.
